La Tgira da monuments dal Grischun ed il Servetsch archeologic dal Grischun organiseschan mintga onn en collavuraziun cun partenaris regiunals e locals ils Dis europeics dal patrimoni en il Grischun. Las occurrenzas da quest onn en l'entir territori chantunal porschan la pussaivladad da s'occupar cun la ritgezza da las fassettas da noss patrimoni cultural e da tgirar la discussiun davart la cultura architectonica tranter la populaziun e persunas spezialisadas.

Quest onn stattan ils Dis europeics dal patrimoni en Svizra sut il motto «Temp liber». La Tgira da monuments dal Grischun ha organisà ensemen cun il Servetsch archeologic dal Grischun e cun intgins partenaris externs occurrenzas attractivas en l'entir territori chantunal, a las qualas èn envidadas cordialmain tut las persunas interessadas. Il tema da quest onn è stà fitg fritgaivel gist en il chantun Grischun, damai che bleras persunas da dalunsch e da damanaivel passentan lur temp liber tar nus en il chantun. Perditgas archeologicas e cunzunt la cultura architectonica istorica e moderna da l'entir chantun dattan perditga da quai. I vala pia la paina d'investir ina part da l'agen temp liber per vegnir a savair dapli davart la cultura da temp liber en il chantun Grischun durant ils Dis europeics dal patrimoni.

Istorgia dal sport, cumbats da gladiaturs, funtaunas mineralas e dapli
In'emprima occurrenza ha lieu venderdi, ils 9 da settember 2022 a Landquart, alura vegni cuntinuà cun il program principal la sonda, ils 10 da settember 2022 a Cuira. Suenter l'avertura uffiziala a las 10.00 tras il cusseglier guvernativ Jon Domenic Parolini e tras il president da la citad da Cuira Urs Marti pon ins vesair gladiaturs romans en il cumbat antic «sin vita e mort» sin la plazza da parcar da la Halla da la citad da Cuira. Ulteriuras visitas guidadas captivantas han lieu tar ils stabiliments da sport Sand, tras la Villa Planta sco er en il Teater Cuira. Cun ina tschaina deliziusa e cun in referat da Georg Jäger davart differents aspects da la cultura da temp liber en il Grischun vegn la sonda concludida.

La fin dals Dis europeics dal patrimoni furman differentas visitas guidadas a San Bernardin ed a Vulpera la dumengia ils 11 da settember 2022. En la Biblioteca chantunala dal Grischun vegn preschentà «Il siemi da la chasa da vacanzas». Er l'inspecziun da la Carschinahütte a St. Antönien sco er il teater d'improvisaziun en il Museum Engiadinais a San Murezzan èn puncts da program captivants durant quest di.

I dat pia per mintgin insatge. Per tschertas occurrenzas èn las plazzas dentant limitadas. I vegn recumandà da s'annunziar a temp. Ulteriuras infurmaziuns chattais Vus sut www.hereinspaziert.ch.

Fotografias agiuntadas:

Cumbats da gladiaturs

Gieus romans a Cuira
Cultura industriala Landquart, Rotunda
Funtauna minerala San Bernandin

Agiunta:

Infurmaziuns:

Simon Berger, tgirader da monuments, Tgira da monuments dal Grischun / Uffizi da cultura, tel. +41 81 257 27 91, e-mail Simon.Berger@dpg.gr.ch

Responsabladad: Uffizi da cultura