Il zercladur è vegnì mess en funcziun in implant fotovoltaic cun ina surfatscha da 130 meters quadrat al portal ost dal tunnel da Trin. Grazia a quest implant po l'energia solara vegnir utilisada per proveder il tunnel en moda persistenta cun electricitad. Quatter ulteriurs implants da quest gener èn en preparaziun. Uschia gida il chantun a realisar la Strategia d'energia 2050 da la Confederaziun ed ad utilisar energias regenerablas en il rom dal «Plan d'acziun Green Deal» ch'è vegnì concludì l'onn 2019 dal Cussegl grond.

Dapi mez zercladur funcziunan las installaziuns da manaschi e da segirezza dal tunnel da Trin sin la via sursilvana H19 per part cun electricitad solara. Producì vegn il current solar d'in nov implant fotovoltaic ch'è vegnì endrizzà al portal ost dal tunnel. Quest lieu porscha premissas idealas areguard l'irradiaziun dal sulegl ed areguard las pussaivladads da montar ils panels solars. Tut en tut han ins pudì installar 72 moduls cun ina surfatscha totala da 130 meters quadrat. Ils moduls produceschan var 21 000 uras kilowatt electricitad per onn, quai che correspunda a la media dal consum annual da sis chasas d'ina famiglia. Uschia vegnan cuvrids tut en tut var sis pertschient dal consum d'energia annual dal tunnel.

L'implant a Trin è l'emprim da ses gener en il chantun Grischun. Quatter ulteriurs implants als tunnels da Crestas, Plattas, Lavin e Runtgaglia 2 èn gia en preparaziun. Cun quests implants gida il chantun a realisar la Strategia d'energia 2050 da la Confederaziun per ina Svizra neutrala al clima sco er ad utilisar energias regenerablas en il Grischun.

«Plan d'acziun Green Deal» sco motiv
Il motiv per realisar l'emprim implant fotovoltaic per il provediment d'electricitad d'in tunnel è stà il program d'impuls «Plan d'acziun Green Deal» ch'il Cussegl grond ha concludì l'onn 2019. Cun quest program promova il chantun mesiras per la protecziun dal clima e per l'utilisaziun da funtaunas d'energia regenerablas. Ina da questas mesiras è d'utilisar pli savens l'electricitad solara per stabiliments d'infrastructura chantunals – latiers tutgan er las installaziuns da manaschi e da segirezza dals tunnels da via. Questas installaziuns èn adattadas spezialmain bain per vegnir provedidas cun electricitad solara, cunquai ch'ellas dovran energia er durant il di.

Sin basa d'ina intervenziun en il Cussegl grond ha l'Uffizi da construcziun bassa analisà gia l'onn 2020 il potenzial da 68 lieus ch'èn situads en ils conturns dals tunnels e da las gallarias e ch'èn en possess dal chantun. Sco criteri decisiv èn resultadas surfatschas da montascha adattadas che sa chattan en la proxima vischinanza dals tunnels. Quellas ston esser fitg suleglivas sco er esser protegidas cunter bovas, glatsch e naiv e na dastgan betg disturbar il maletg da la cuntrada. En cas da novs projects da vias – sco per exempel tunnels, gallarias u gronds mirs da sustegn – examinescha l'Uffizi da construcziun bassa la pussaivladad d'utilisar l'energia solara per la producziun d'electricitad en l'avegnir gia durant l'elavuraziun dal project.

Fotografias agiuntadas:

Foto 2, Foto 3

Agiunta:

Infurmaziuns:

• Cusseglier guvernativ dr. Mario Cavigelli, Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
• Reto Knuchel, inschigner chantunal, Uffizi da construcziun bassa dal Grischun, tel. +41 81 257 35 01, e-mail Reto.Knuchel@tba.gr.ch

Responsabladad: Departament d'infrastructura, energia e mobilitad