Il Grischun è il chantun ospitant a la OLMA da quest onn a Son Gagl. Quai duai esser ina OLMA che vegn a restar en fitg buna memoria a las visitadras ed als visitaders. Gidar a cuntanscher questa finamira duai er in'emprova dal Grischun da far in record mundial: la producziun dal capun il pli lung.

Ils 15 d'october 2022, il «Di dal chantun envidà», ha lieu l'avantmezdi il til da la OLMA, nua ch'il Grischun offra al public ina delicatessa: capuns dal Grischun. Tut tenor la devisa «simplamain da nar!» vegnan quai ad esser buccadas d'in capun istoric, dal capun grischun da record mundial. Bain n'è inscrit nagin record mundial da capuns en il cudesch da records Guinness. In record inuffizial è però enconuschent en il Grischun. El è vegnì stabilì l'onn 2018. Il capun ch'ins ha producì quella giada aveva ina lunghezza da 16,44 meters. Il capun da la OLMA duai ussa avair ina lunghezza da 17 meters. Il capun da record mundial vegn fatg dal team da producziun da la Graubünden Vivonda SA che maina il center da cumpetenza graubündenVIVA a Jenaz.

Da Jenaz en la citad da Son Gagl
Il capun vegn preproducì a Jenaz. La damaun baud dals 15 d'october 2022 parta la spezialitad da 17 meters cun in tractor davent da Jenaz. Sin il char dal tractor vegn il capun transportà entaifer circa 3 uras fin a Son Gagl. La delicatessa da record mundial vegn preschentada al til. Ma pli ditg ch'il til dura, e pli pitschen ch'il capun vegn. Durant il til taglian las producentas dal capun grischun, sut la direcziun da las soras Bablina ed Andrina Caprez, il capun en buccadas. Quellas vegnan alura servidas da las studentas e dals students da la Scola d'hotellaria Passugg a las visitadras ed als visitaders dal til.

Il capun da record mundial vegn fatg or d'ingredienzas regiunalas dal Grischun: farina da furment da Casti, urtais da Malans, charn da Ramosch. Il recept deriva da la tatta da Bablina ed Andrina Caprez.

Emna grischuna en ils manaschis gastronomics da Son Gagl
Gia in'emna avant la OLMA (dals 5 fin ils 12 d'october 2022) offran ils manaschis gastronomics da Son Gagl, organisà da graubündenVIVA, spezialitads grischunas en lur restaurants. Quai èn capuns, plattas grischunas, biera grischuna sco er il vin adattà dal Signuradi. Sco il capun da record mundial vegnan er quests capuns producids da la Graubünden Vivonda SA.

Ulteriuras infurmaziuns davart la preschentaziun ospitanta dal Grischun a la OLMA 2022 vegnan publitgadas cuntinuadamain sin la pagina d'internet https://olma22.gr.ch.

Fotografia agiuntada:

Foto 2

Infurmaziuns:

Responsabladad: Departament d'economia publica e fatgs socials