La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) concernent la finanziaziun da projects per la renovaziun da l'infrastructura stradala dal transport d'autos. Essenzialmain sa tracti d'in credit supplementar per investiziuns da renovaziun pli grondas ch'èn necessarias ils proxims onns per il transport d'autos.

Da princip beneventa la Regenza l'intenziun dal Cussegl federal da dumandar in credit supplementar da 40 milliuns francs al credit d'impegn current «Contribuziuns d'investiziun per il transport d'autos 2019» da 60 milliuns francs. Betg perencletg n'è il chantun Grischun dentant cun la proposta da midar il sistem da finanziaziun per il material rullant dal transport d'autos. Ina finanziaziun estra chaschunass custs supplementars per il transport d'autos. Il chantun Grischun fiss pertutgà fermamain da questa midada, cunquai che bunamain tut il material rullant per il transport d'autos sto vegnir remplazzà ils proxims onns sin la lingia dal Veraina.

Link: Consultaziuns dal Departament federal per ambient, traffic, energia e communicaziun

La Regenza ha prendì enconuschientscha dal resultat da l'analisa da l'egualitad da las pajas per l'administraziun chantunala dal Grischun. En quella vegn constatada ina differenza da paja da 3,9 pertschient a disfavur da las dunnas.

L'analisa è vegnida fatga da l'Uffizi da persunal dal chantun Grischun cun agid dal program da standard da la Confederaziun. Sin basa da l'avrigl 2021 sco mais da referenza èn vegnidas resguardadas 3597 unitads da datas. Da questas unitads èn 1427 (39,7%) unitads da dunnas. Resguardond las caracteristicas che pertutgan la persuna e la plazza gudognan las dunnas – tenor questa analisa da l'egualitad da las pajas – 3,9 pertschient damain ch'ils umens. Perquai ch'il resultat sa chatta entaifer la limita da toleranza da 5 pertschient, na duvrassi – tenor la Lescha d'egualitad – nagina ulteriura analisa da l'egualitad da las pajas. Cun la finamira da tuttina reducir la differenza tranter las pajas da las dunnas e dals umens vegn ussa fatga in'analisa detagliada per eruir il basegn d'agir concret.

La Regenza ha incumbensà la Scola auta da pedagogia dal Grischun (SAPGR) da cumbinar il studi da master «Stgalim secundarI» (sin basa d'in bachelor spezialisà) cun il studi da master «Stgalim secundarI e scolas da maturitad» (sin basa d'in bachelor spezialisà / master spezialisà) e da porscher quai sco ulteriur studi cumplementar a la professiun. Tras la purschida coordinada pon vegnir stgaffidas sinergias preziusas en spezial en il sectur da la scolaziun da la didactica dal rom, ma er en il sectur da l'expertisa dal rom. Tuts dus studis vegnan sviluppads e purschids ensemen cun la Scola auta da pedagogia da Son Gagl. Las duas scolas autas mainan ils studis en lur portfolio ed als porschan individualmain sco studi da sis semesters a temp parzial.

Cun resalva da l'approvaziun dal credit tras il Cussegl grond ha la Regenza incumbensà la Scola auta da pedagogia dal Grischun (SAPGR) da manar tras ina scolaziun da «persuna d'instrucziun dal stgalim secundarI». Questa scolaziun cumplementara a la professiun ha lieu a partir da l'atun 2023 fin l'avust 2026 en cooperaziun cun la Scola auta da pedagogia da Son Gagl. La purschida da furmaziun supplementara è averta per persunas d'instrucziun che instrueschan actualmain sin il stgalim secundarI cun in diplom d'in auter stgalim u che vulan midar dal stgalim primar al stgalim secundarI.

La furmaziun supplementara da la SAPGR vegn purschida cumplementarmain a la professiun ed ha l'intent da scolar las persunas d'instrucziun uschia, che lur scolaziun correspunda al stgalim secundarI. Qua tras èsi pussaivel da far frunt a la mancanza actuala da persunas d'instrucziun.

La Regenza ha garantì ina contribuziun chantunala da maximalmain 759 200 francs a l'Associaziun per la chasa d'emprendistas e d'emprendists da l'Engiadin'Ota a Samedan per renovar sco planisà las chombras en il tract dals mats en la chasa.

Il november 2021 aveva la Regenza approvà la dumonda da contribuziun per la renovaziun dal tract da las mattas (communicaziun da la Regenza dals 2 da december 2021). La chasa d'emprendistas e d'emprendists ch'è vegnida construida l'onn 1968 porscha ina dimora cun alimentaziun a circa 70 giuvenils che absolvan ina furmaziun professiunala. Las surfatschas ed ils interiurs da las chombras dals plauns d'abitar èn per part passa 50 onns vegls e ston vegnir sanads. En il tract dals mats èsi previs da midar trais chombras dublas en sis chombras singulas sco er d'equipar tut las chombras dublas e singulas cun agens locals sanitars. En l'avantchombra da las stanzas vegnan ultra da quai installads per mintga emprendist mintgamai dus elements da stgaffa che pon vegnir serrads cun la clav. Tras la renovaziun da tut las surfatschas sco er tras la montascha da mobiglias funcziunalas en las chombras vegnan purschidas en il futur localitads modernas ed agreablas. Tut en tut resultan en questa segunda etappa 28 chombras novas: 24 èn chombras singulas senza obstachels e 4 èn chombras dublas.

La Regenza ha approvà il project «Batschigl d'aua da stizzar fieu Fontaunas» da la vischnanca da Cazas ed ha garantì ina contribuziun chantunala da maximalmain 352 000 francs per quest intent. Sco mesira principala cumpiglia il project la construcziun d'in batschigl d'aua da stizzar fieu en il territori Fontaunas sur la zona d'industria Realta. Las mesiras previsas correspundan al Concept chantunal da prevenziun cunter incendis da guaud 2030.

En il territori dal project n'existan nagins lieus da retratga d'aua natirals, sco lais u auals, che permettessan da retrair aua da stizzar fieu cun agid da helicopters, d'autos-cisterna u da pumpas. Quest project serva a meglierar l'infrastructura dal cumbat cunter incendis da guaud ed uschia a segirar la funcziun da protecziun dal guaud.