L'Archiv dal stadi dal Grischun (Uffizi da cultura) sa legra da preschentar la publicaziun la pli nova en sia retscha Funtaunas e perscrutaziuns davart l'istorgia dal Grischun (FIG). Cun tge structuras uffizialas e cun tge instruments finanzials han ins fatg frunt a la miseria sociala en il Grischun durant il 19avel e 20avel tschientaner? Tge consequenzas economicas pudevan ins observar? A questas dumondas sa deditgescha il cudesch.
En il Grischun era il provediment dals povers en emprima lingia ina incumbensa da las vischnancas burgaisas. Ma ellas eran savens surdumandadas cun ademplir quest pensum. La Lescha da domicil da l'onn 1874 aveva autorisà da nov las vischnancas politicas empè da las vischnancas burgaisas da s'occupar dal provediment. En blers lieus èsi dentant restà ditg intschert, tge «vischnanca» che stoppia ussa propi surpigliar las chargias dal provediment. Il chantun è daventà pir relativamain tard actur en l'agid social. El ha sustegnì numerusas vischnancas deficitaras cun contribuziuns considerablas a favur da lur expensas per ils povers.
A maun dals relaschs chantunals ed a maun d'ulteriuras funtaunas sco er cun in sguard pli profund sin las relaziuns en tschertas vischnancas descriva il nov tom FIG, co che l'apparientscha da l'agid social è sa transfurmada durant ils ultims dus tschientaners.
Fotografia agiuntada:
Povras cundiziuns da viver: L'ultim cutsch da Vaz Sut, «Pfunau-Seppli» (Josef Vonau, 1909–1979), cun ses bab en il Hirschland da Vaz Sut a la «marenda» da suentermezdi.
Agiunta:
Infurmaziuns detagliadas davart il cudesch
Exemplars da recensiun pon vegnir dumandads sut Florian.Hitz@sag.gr.ch.
Vernissascha:
Mardi, ils 27 da settember 2022, a las 18.30, sala dal Cussegl grond Cuira
Cun aperitiv en il foyer da la sala dal Cussegl grond.
Infurmaziuns:
Responsabladad: Uffizi da cultura / Archiv dal stadi