L'atun pon la ristga da s'infectar e la ristga da survegnir COVID-19 sco er la chargia per il sistem da sanadad puspè s'augmentar. Per reducir la ristga da daventar grevamain malsaun e per limitar la chargia per il sistem da sanadad ha l'Uffizi federal da sanadad (UFSP) adattà las recumandaziuns da vaccinaziun. En il center stat la protecziun da las persunas spezialmain periclitadas. Durant 4 emnas vegn manà a Cuira in ulteriur center per laschar rinfrestgar las vaccinaziuns.
L'atun 2022 stoi danovamain vegnir fatg quint cun in augment da las infecziuns e dals dumbers da cas. En cumparegliaziun cun ils dus ultims envierns da la pandemia è la situaziun dentant sa midada cleramain: En Svizra possedan actualmain passa 97 pertschient da la populaziun anticorpuls cunter SARS-CoV-2, perquai ch'els èn vaccinads u guarids da COVID-19. Las persunas senza facturs da ristga han ina pitschna ristga da daventar grevamain malsaunas quest atun.
La protecziun da persunas spezialmain periclitadas stat en il center
En il center da la recumandaziun da vaccinaziun da l'atun 2022 stat perquai la protecziun da las persunas spezialmain periclitadas cunter in grev decurs da la malsogna:
- persunas da 65 onns e pli veglias;
- persunas tranter 16 e 64 onns che han ina ristga individuala pli gronda da daventar malsaunas, per exempel pervia d'ina malsogna preexistenta u pervia d'ina gravidanza.
Vaccinaziuns da rinfrestgament pon reducir absenzas a la plazza da lavur
En segunda lingia vala la recumandaziun da vaccinaziun per persunas da 16 fin 64 onns senza facturs da ristga, che lavuran en la tgira acuta ed en la tgira da lunga durada u che tgiran persunas spezialmain periclitadas en l'ambient professiunal u privat. A questas persunas porscha la vaccinaziun da rinfrestgament per in curt temp ina tscherta protecziun cunter ina infecziun e cunter la malsogna. Fin ad in tschert grad po la vaccinaziun da rinfrestgament er reducir absenzas a la plazza da lavur. Ultra da quai restrenscha ella il privel da patir da «Long COVID».
Ina recumandaziun generala datti er per tut las autras persunas da 16 fin 64 onns senza facturs da ristga. Tut tenor la valitaziun e la decisiun individuala è la vaccinaziun da rinfrestgament raschunaivla per questas persunas, sch'ellas vulan minimar la ristga d'in grev decurs da la malsogna.
Recumandà da duvrar ils vaccins da la segunda generaziun
I vegn recumandà da laschar rinfrestgar las vaccinaziuns cun vaccins mRNA (Pfizer/BioNTech / Moderna) u cun Nuvaxovid (Novavax). Per las vaccinaziuns da rinfrestgament duain vegnir injectads da preferenza ils vaccins mRNA bivalents ch'èn adattads a la varianta Omicron BA.1. I po dentant er vegnir vaccinà vinavant cun il vaccin mRNA monovalent vegl. Laschar rinfrestgar las vaccinaziuns duain ins il pli baud 4 mais suenter l'ultima vaccinaziun u suenter la guariziun. Tut las vaccinaziuns che correspundan a las recumandaziuns dal UFSP e da la Cumissiun federala per vaccinaziuns (CFV) èn gratuitas.
Nov center da booster a Cuira
En coordinaziun cun la campagna naziunala da vaccinaziun vegnan la citad da Cuira, l'Ospital chantunal dal Grischun sco er l'Uffizi chantunal da sanadad a manar cuminaivlamain in center da booster. Quest center sa chatta davant la Halla da la citad da Cuira e porscha cussegliaziuns da vaccinaziun, emprimas vaccinaziuns sco er vaccinaziuns da rinfrestgament. La purschida stat a disposiziun dals 11 d'october 2022 fin ils 5 da november 2022, mintgamai mardis fin sonda, da las 10.00 fin las 18.00.
S'annunziar per ina vaccinaziun cunter il coronavirus pon ins vinavant online sut www.gr.ch/vaccinar. Ina survista actuala dals posts da vaccinaziun en il chantun Grischun è disponibla sut www.gr.ch/impfzentren.
Uschia As protegis Vus vinavant
L'Uffizi da sanadad observa cuntinuadamain la situaziun epidemiologica. Actualmain na dovri naginas mesiras uffizialas per franar ils dumbers da cas. Vinavant vegni recumandà da sa laschar vaccinar, da restar a chasa en cas da sintoms, da purtar ina mascrina en cas da fullas da glieud, da dar aria a las stanzas pliras giadas a di, da tusser e da starnidar en in fazielet u en la foppa dal cumbel sco er da lavar bain ils mauns u da dischinfectar ils mauns.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch
Responsabladad: Uffizi da sanadad