La cumissiun ad hoc dal Cussegl grond, ch'è vegnida nominada per predeliberar la missiva concernent la realisaziun dal Center da scola auta spezialisada dal Grischun, sustegna unanimamain il project.

Sut la direcziun da ses president Roman Hug ha la cumissiun predeliberanta laschà declerar la missiva da la Regenza concernent la construcziun d'in nov center da scola auta per la Scola auta spezialisada dal Grischun (SASGR). Las infurmaziuns detagliadas èn vegnidas furnidas da represchentants da l'administraziun chantunala e da la SASGR. D'ina vart è vegnida mussada la necessitad da l'edifizi planisà. Da l'autra vart ha la cumissiun pudì sa persvader da l'adequatezza dal nov edifizi che duai custar 178 milliuns francs.

Segirar l'avegnir da la SASGR
La SASGR è creschida cuntinuadamain durant ils ultims onns. Ils dumbers da studentas e students èn sa dublegiads entaifer ils ultims 10 onns ed il volumen da perscrutaziun è ussa bunamain trais giadas pli grond. Per pudair cuvrir il basegn da spazi è il manaschi da scola auta repartì oz sin tschintg differents lieus ed en nov edifizis, uschia che l'instituziun na po betg pli vegnir manada en moda effizienta. Ord vista da la politica da furmaziun, da perscrutaziun e d'innovaziun è la SASGR da gronda impurtanza per il chantun Grischun, e quai er sut l'aspect da la mancanza da persunas spezialisadas. Cun concentrar ils blers lieus sin in areal a la Pulvermühlestrasse sa lascha eliminar il dischavantatg infrastructural. A medem temp po vegnir garantì in avantatg economic per la SASGR a Cuira Vest. Il lieu attractiv per las studentas ed ils students sa chatta en la vischinanza da la staziun Cuira Vest, da l'access a l'autostrada Cuira Sid, dals stabiliments da sport e da temp liber sco er da la zona da recreaziun vischina Rossboden.

En ina discussiun extendida ha la cumissiun er tractà la dumonda, quant segir ch'igl è che la giuvna scola auta spezialisada existia vinavant. La cumissiun ha pudì sa persvader che la SASGR è posiziunada fitg bain, e quai tant en reguard strategic sco er en vista a las pretensiuns d'accreditaziun.

Auts custs giustifitgads
Il project da construcziun custa 178 milliuns francs. Ina part considerabla da questa summa – previsiblamain 27 milliuns francs – vegn surpigliada da la Confederaziun. Ord vista da l'urbanistica s'integrescha il nov edifizi bain en il quartier existent ed el è bain accessibel. En il rom da la construcziun vegni medemamain tegnì quint da la persistenza sut l'aspect da l'entir ciclus da vita. Er a maun d'ina cumparegliaziun cun auters campus en Svizra ha la cumissiun pudì sa persvader ch'ils custs dal project stattan en ina proporziun commensurada.

Correspundentamain è la cumissiun entrada unanimamain en il project. Ed unanimamain recumonda ella er al Cussegl grond d'acceptar il credit per construir in nov center da scola auta per la SASGR.

Il Cussegl grond vegn a tractar questa fatschenta en la sessiun d'october 2022. Premess ch'il Cussegl grond dettia ses consentiment, è il conclus suttamess al referendum da finanzas obligatoric. Il pievel grischun vegn previsiblamain a votar il mars 2023 en chaussa.

Infurmaziuns:

Responsabladad: Cussegl grond / cumissiun predeliberanta ad hoc