Cun l'enquista dals giasts durant la stagiun da stad 2022 è il cumenzament dal studi da valurisaziun davart il turissem en il chantun Grischun gartegià cun success. Er durant la stagiun d'enviern vegninta 2022/2023 vegnan puspè intervistads giasts, persunas indigenas sco er possessuras e possessurs d'abitaziuns secundaras e da nov er interpresas.
Danunder vegnan ils giasts che visitan il chantun Grischun? Quant ditg restan els? Per tge chaussas dattan els ora daners? Quantas plazzas da lavur stattan directamain ed indirectamain en connex cun il turissem? Questas dumondas èn decisivas per pudair sviluppar vinavant il turissem en il chantun. Cun il material da datas avant maun n'èsi betg anc pussaivel da respunder definitivamain questas dumondas. Per obtegnair las basas per respunder questas dumondas, elavura la firma EBP Svizra – per incumbensa da l'Uffizi per economia e turissem – in studi cumplessiv davart il turissem en il chantun Grischun e sia prestaziun da crear valurisazun ed occupaziun. Il studi ha la finamira da mussar l'impurtanza economica dal turissem e ses entretschament cun l'economia regiunala. En il rom dal studi da valurisaziun vegnan analisadas individualmain tut en tut 15 differentas regiuns turisticas dal chantun. Uschia pon ins obtegnair resultats cumparegliabels sin plaun regiunal e chantunal.
Intervistas cun giasts ed interpresas durant la stagiun d'enviern vegninta
Il zercladur 2022 ha cumenzà en l'entir Grischun la gronda enquista da giasts dal di e da giasts che pernotteschan. Durant la stagiun da stad han intervistadras ed intervistaders ch'enconuschan bain il lieu gia fatg passa 13 000 intervistas curtas cun giasts da la Svizra e da l'exteriur en passa 150 lieus e tar occurrenzas en tut las regiuns dal chantun. Las datas obtegnidas porschan infurmaziuns davart la structura dals giasts e davart la moda e maniera, co che las persunas dumandadas dattan ora lur daners. Durant la stagiun dal december 2022 fin l'avrigl 2023 suonda ussa la segunda runda d'enquistas cun intervistar persunas indigenas e giasts da vacanzas sin la muntogna ed en la val. En il rom da l'enquista supplementara da las persunas cun segund domicil han plinavant gia 5000 persunas respundì il questiunari online. Envidadas da far quai èn ellas vegnidas da las vischnancas u da las organisaziuns turisticas per posta. En ulteriuras parts dal chantun vegn l'invit da sa participar a questa enquista pir anc a suandar e tramess en il decurs dals proxims mais tenor regiun. Las enquistas da la vart da la purschida e da la vart da la dumonda duran fin la stad 2023. Per pudair far constataziuns fidadas speran ins, che uschè bleras persunas sco pussaivel sa participeschian a las enquistas. Ils resultats da l'analisa vegnan ad esser avant maun il cumenzament da l'onn 2024.
Tschertgà intervistadras ed intervistaders
Per ch'ils giasts possian vegnir intervistads sco planisà, vegnan tschertgads intervistadras ed intervistaders en tut las regiuns dal chantun per in engaschament flexibel. Persunas interessadas a partir da 17 onns ch'èn prontas da far intervistas cun giasts en hotspots turistics (centers da lieus, territoris da sport da naiv ed occurrenzas), pon s'annunziar sut befragungen@ebp.ch.Per far las intervistas vegn pajà in salari correspundent.
Agiunta:
Inserat da plazza per intervistadras ed intervistaders
Infurmaziuns:
Luzius Stricker, manader da la partiziun Statistica e registers, Uffizi per economia e turissem, tel. +41 81 257 23 74, e‑mail Luzius.Stricker@awt.gr.ch
Responsabladad: Uffizi per economia e turissem