Dunnas èn raras en professiuns ed en branschas tecnicas. Il potenzial da persunas spezialisadas n'è, er en il Grischun, lunschor betg exaurì. Teams differenziads enritgeschan la cultura d'interpresa cumprovadamain e sa pajan er economicamain. L'occurrenza «Diversity in Leadership & Tech» a la Scola spezialisada superiura da la Svizra Sidorientala a Cuira (ibW) ils 8 da november tschenta dumondas davart ils motivs e davart las pussaivladads.

I vegn discurrì dapertut da «diversity». Translatà pled per pled signifitga il pled «varietad», «diversitad» u er «inegualitad». Ma la noziun englaisa cumpiglia bler dapli: ina tenuta, ina tendenza sociala, in process cun la finamira da renconuscher e d'appreziar tut las persunas, quai independentamain da lur origin, da lur schlattaina, da lur orientaziun sexuala u da lur ideologia. Firmas che sa laschan involver en quest process, han blers avantatgs che sa pajan er economicamain, quai che studis conferman pliras giadas. Uschia portan divers teams per exempel soluziuns pli persistenzas e pli creativas. En connex cun la recrutaziun han interpresas ina tscherna pli vasta – quai po esser decisiv considerond la situaziun actuala da la mancanza da persunas spezialisadas.

L'occurrenza «Diversity in Leadership & Tech» declera mardi, ils 8 da november 2022, a la Scola spezialisada superiura da la Svizra Sidorientala (ibW) a Cuira, la branscha tecnica e dad IT en il Grischun. En spezial èn dunnas en questas professiuns stgarsas. L'occurrenza metta a disposiziun fatgs, dat impuls da reflexiun, furnescha buns exempels e porscha l'occasiun per in barat.

Superar barrieras structuralas
Luisa Delgado, interprendidra, cussegliadra e mentura, raquinta en ses referat «Cracking the Class Ceiling» da sias experientschas en la vita economica interculturala. Bettina Bachmann da «Women in Tech Switzerland» preschenta las cifras actualas per la Svizra e per il Grischun. Sin il podium discutan silsuenter represchentantas e represchentants dal maun public, da l'economia e da la scienza, co ch'il potenzial da persunas spezialisadas po vegnir duvrà meglier, co che la cumpatibilitad da professiun e d'ulteriurs secturs da la vita po vegnir meglierada e tge midadas structuralas e culturalas ch'i dovra per in mund da lavur senza pregiudizis, en il qual tut las collavuraturas e tut ils collavuraturs pon sa sviluppar il meglier pussaivel independentamain da lur origin, da lur religiun u da lur ideologia.

L'occurrenza vegn purtada d'in comité d'organisaziun multifar. Barbara Wülser, manadra dal Post da stab per l'egualitad da las schanzas, appreziescha en questa collavuraziun, che circuls pli vasts pon vegnir cuntanschids e ch'il tema diversitad po vegnir francà meglier: «Questa collavuraziun interdisciplinara è in novum en il Grischun ed impurtanta per dumagnar barrieras structuralas.»

Ils resultats e las experientschas da l'occurrenza duain gidar ad etablir a pli lunga vista la diversitad ed il barat d'experientschas en il Grischun. Per il Grischun sco plazza economica saja la diversitad ina necessitad, accentuescha Reto Bleisch, manader da l'Uffizi per economia e turissem. «Gist en ils secturs tecnologia, perscrutaziun ed IT stuain nus tegnair quint dals svilups rasants da l'ultim temp e chattar novas vias e novas soluziuns per la cumpatibilitad da viver e da lavurar.»

Occurrenza cun in vast sustegn
L'occurrenza «Diversity in Leadership & Tech» a la Scola spezialisada superiura da la Svizra Sidorientala (ibW) a Cuira vegn organisada communablamain dal Center d'innovaziun CSEM, dal Post da stab per l'egualitad da las schanzas, da l'Academia Raetica, da «Women in Tech Switzerland», da la Scola auta spezialisada dal Grischun (SASGR), da la Somedia e da l'agentura Markenkern. Sustegn porschan tranter auter l'Uffizi per economia e turissem, la Banca chantunala grischuna, las ewz, la CMP, la SASGR, la Cedes SA, l'Integra Biosciences sco er il Center da las IPM dal Grischun.

Ulteriuras infurmaziuns davart l'occurrenza stattan a disposiziun sin la pagina d'internet www.diversity-gr.ch.

Fotografia agiuntada:

Tecnica è chaussa d'umens e da dunnas – l'occurrenza «Diversity in Leadership & Tech» discuta, co che nus arrivain là. (implant da fotovoltaica sin l'edifizi administrativ Sinergia) ©Yanik Bürkli

Infurmaziuns:

Barbara Wülser, manadra dal Post da stab per l'egualitad da las schanzas, tel. +41 81 257 35 71, e‑mail Barbara.Wuelser@stagl.gr.ch (cuntanschibla da las 09.00 fin las 11.00 e da las 16.00 fin las 17.30)

Responsabladad: Post da stab per l'egualitad da las schanzas