La via d'Ardez collia la via d'Engiadina cun la via da Ftan en il center dal vitg dad Ardez. Sur gronds trajects ha l'access in standard da construcziun fitg modest, perquai che la substanza architectonica è antiquada. Intginas construcziuns artifizialas, sco il surpassadi da la Viafier retica e las construcziuns da sustegn, han in stadi manglus. Sin la via existenta valan restricziuns areguard il pais ed areguard la geometria dals vehichels. Il traffic da camiuns pesants po charrar sin la via d'Ardez cun maximalmain 28 tonnas. Ultra da quai vala sin l'entir traject in scumond per chars annexs. Ils privels da la natira, en spezial crudadas da crappa, èn ina gronda sfida per il mantegniment e chaschunan adina puspè lavurs da rumida e curtas serradas da la via.

Per quest intent ha la Regenza approvà in project per sanar la via. Quel prevesa da schlargiar il vial da la via d'Ardez ad ina ladezza da 5,8 meters. Quai augmenta la segirezza dal traffic sco er dal manaschi. La lunghezza totala da la sanaziun importa circa 750 meters. Plinavant pussibilitescha la correcziun als autos da posta da charrar senza conflicts fin Ardez. Pervia dal nausch stadi dals mirs da sustegn existents da la vart da la val vegn il trassé actual schlargià da la vart da la val. Per motivs da la tgira da monuments vegnan ils mirs munids cun miraglia da crappa natirala. Ils custs totals da quest project importan var 7,2 milliuns francs.

La Regenza ha approvà in project da correcziun da la via da Val S. Pieder tranter Waldheim e Hansjola (chaplutta da son Niclà). Il traject d'ina lunghezza da circa 430 meters na correspunda betg pli a las pretensiuns dad oz envers ina via chantunala. Dus autos da posta u camiuns na pon betg sa cruschar en quest lieu. Las relaziuns da spazi limitadas restrenschan la segirezza da las participantas e dals participants dal traffic.

La renovaziun planisada prevesa da reparar la surstructura sco er da meglierar il trassé da la via en ils secturs stretgs e nunsurvesaivels. Il schlargiament ch'è necessari per quest intent vegn fatg sin l'entira lunghezza da la vart da la val. Ils custs totals dal project importan circa 4,2 milliuns francs.