Dals 25 da november fin ils 10 da december 2022 han lieu en il Grischun ils dis d'acziun annuals cunter violenza a chasa. Il tema central da quest onn è «femicidi». Planisadas èn numerusas occurrenzas ed acziuns variadas en l'entir chan.

Mintga segunda emna capita in femicidi en Svizra, quai vul dir ch'ina dunna vegn mazzada da ses partenari u da ses um. Cun ils dis d'acziun da quest onn vul il chantun Grischun ensemen cun differentas organisaziuns far attent al tema «femicidi», ma er als cumenzaments da la violenza a chasa. Savens cumenza quella numnadamain en moda innocenta e senza ch'insatgi la bada. Il quità – «Tge fas ti, nua es ti?» – sa mida en controlla, il skerz – «Mia quaclina!» – sa mida en umiliaziun e l'armonia – «Il pli gugent fiss jau mo ensemen cun tai!» – sa mida en isolaziun. Perquai èsi impurtant da guardar d'emprim ennà.

Violenza a chasa na vegn betg en il stgarnuz
En l'entir chantun Grischun han lieu las pli differentas occurrenzas – da l'acziun da stans cun punsch d'oranschas sur l'illuminaziun d'edifizis fin a l'installaziun sin la plazza dal teater a Cuira. L'acziun originala «Häusliche Gewalt kommt bei uns nicht in die Tüte», nua che las pasternarias vendan lur paun en stgarnuzs spezials, ha quest onn lieu a Tavau, en il Partenz, en l'Engiadin'Ota ed Engiadina Bassa, en las valladas dal sid sco er a Cuira. Tar las organisaturas da las occurrenzas ed acziuns tutgan tranter auter il Club Soroptimist, il Club Zonta, l'Associaziun svizra da las academicras, la Chasa da dunnas sco er il Collectiv da la chauma da dunnas dal Grischun.

Engaschament durant l'entir onn
Il chantun Grischun s'engascha durant l'entir onn per prevegnir e per cumbatter la violenza a chasa. Il post da coordinaziun Violenza a chasa sa metta en per ina collavuraziun interdisciplinara da tut las autoritads ed instituziuns ch'èn activas en il sectur da la violenza a chasa, realisescha campagnas da prevenziun e da sensibilisaziun e promova purschidas per persunas pertutgadas da violenza sco er per persunas che commettan violenza. Plinavant coordinescha il post la realisaziun da la Convenziun dad Istanbul.

Ulteriuras infurmaziuns sut violenza-a-chasa.gr.ch

Agiunta:

Flyer Dis d'acziun cunter violenza a chasa

Infurmaziuns:

Sabina Altermatt, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Sabina.Altermatt@soa.gr.ch

Responsabladad: Uffizi dal servetsch social