Tge signifitga exactamain «LGBTIQ+»? Quant avert è il Grischun envers persunas queer? Questas ed ulteriuras dumondas stattan en il center da l'occurrenza publica «LGBTIQuo vadis, Grischun?» dals 30 da november 2022 en la Biblioteca da la citad da Cuira. Cun in referat d'input, cun ina discussiun al podium e cun in plaz fiera accentuescha il Post da stab per l'egualitad da las schanzas la diversitad.

Ils ultims onns hai dà moviment. «LGBTIQ+» è entrà en la conscienza publica. Er en il Grischun daventan la varietad e la diversitad pli visiblas, betg sco ultim cun la «Khur Pride» che ha gì lieu per l'emprima giada il zercladur 2022. I na vegnan betg mo celebradas la diversitad, las libertads e l'acceptanza, mabain er pretendids ils medems dretgs senza discriminaziun. Tut las persunas duain pudair sviluppar e realisar lur potenzials e lur vita reala. Quai independentamain da lur schlattaina biologica, da lur identitad da schlattaina u da lur orientaziun sexuala.

Nua è il Grischun en quest process? Quant avert è il Grischun envers persunas queer? Tge signifitga «LGBTIQ+»? Tge experientschas fa la communitad en il mintgadi, en la politica ed en la societad? Per discutar questas ed ulteriuras dumondas, envida il Post da stab per l'egualitad da las schanzas mesemna, ils 30 da november 2022, a l'occurrenza «LGBTIQuo vadis, Grischun?» en la Biblioteca da la citad da Cuira.

Spazi per midadas
Savens sentan las persunas che na correspundan betg a la norma supponida areguard lur identitad da schlattaina u areguard lur orientaziun sexuala gia fitg baud quai. Bleras giadas pateschan ellas en la societad actuala, perquai che las imaginaziuns ed ils rituals dad oz èn fitg binars, quai vul dir ch'els èn orientads a duas schlattainas. «L'abilitad da s'imaginar ina diversitad manca savens. Midadas cumenzan cun l'atgna tenuta», uschia Barbara Wülser, manadra dal Post da stab per l'egualitad da las schanzas. «Impurtant èsi da reflectar: Co m'avischin jau ad ina persuna, sche jau sun en ina posiziun privilegiada? Taidlel jau tiers cun attenziun? Lasch jau discurrer ils auters e dun jau ad els l'occasiun da cundecider?»

La communitad da persunas queer è en la «fasa da moviment»: Las commembras ed ils commembers lavuran gratuitamain, en uffizi d'onur ed en moda activistica. «Quest moviment è cumparegliabel cun il moviment da las dunnas avant 30 fin 40 onns», explitgescha Barbara Wülser. Gia l'onn 1996 è vegnì fundà en il Grischun il Post da stab per dumondas d'egualitad, pli tard Post da stab per l'egualitad da las schanzas. Cun in sguard sin la communitad da las persunas queer fan las participantas ed ils participants dal podium ils 30 da november er la dumonda: Tge pon la communitad da persunas queer ed il moviment da las dunnas emprender in da l'auter?

La diversitad è program
Cun in referat d'impuls davart il tema «LGBTIQ+» avra Patrizia Sutter, experta ti-es-ti e lavurera sociala, l'occurrenza. Al podium discutan Nic Senften, suprastanza Khur Pride, Vitoria Colagrande, bierer diplomà / oz collavuratura ICT tar l'Uffizi per industria, mastergn e lavur, Silvia Hofmann, deputada da la PS ed experta per dumondas da l'egualitad sco er Kandid Jäger, Agid grischun cunter AIDS e lavurer social, davart ils terms impurtants e davart ils craps da stgarpitsch dal Grischun queer. In plaz fiera cun in apero porscha suenter la pussaivladad da s'infurmar vinavant e da sa barattar. Per motivs organisatorics vegni supplitgà da s'annunziar sut www.gr.ch/va-stagl.li, visitas spontanas èn dentant medemamain bainvegnidas.

Infurmaziuns:

Barbara Wülser,manadra dal Post da stab per l'egualitad da las schanzas, tel. +41 81 257 35 71 (cuntanschibla a partir da las 11.30), e‑mail Barbara.Wuelser@stagl.gr.ch

Responsabladad: Post da stab per l'egualitad da las schanzas