Las taxas per il traffic sin via en il chantun Grischun daventan pli bunmartgadas a partir dal 1. da schaner 2023. La Regenza ha approvà la revisiun totala da l'ordinaziun respectiva. Las reducziuns èn en la dimensiun d'in pèr paucs francs fin maximalmain 120 francs. Singulas taxas vegnan però augmentadas levamain, perquai che las tariffas da taxas vertentas na cuvran betg ils custs che resultan a l'Uffizi per il traffic sin via per furnir las prestaziuns correspundentas. Las adattaziuns pertutgan var dus terzs da las taxas. Tut en tut sa chattan las novas taxas circa en la media svizra.

In'ulteriura novaziun concerna l'emissiun dals numers e da las vignettas da velos a motor. A partir dal 1. da schaner 2023 na pon ils numers e las vignettas da velos a motor betg pli vegnir retratgs tar las vischnancas en il chantun Grischun. Da nov è l'Uffizi per il traffic sin via cumpetent en chaussa. Las possessuras ed ils possessurs da velos electrics e da velos a motor, che han retratg lur vehichel l'onn 2022 tras ina vignetta tar l'Uffizi per il traffic sin via, survegnan mez schaner in quint per la vignetta 2023. Suenter ch'els han pajà quest quint, als vegn tramessa la vignetta per posta. Tgi che na vul betg pli ina vignetta, desista dal pajament. Uschia vala l'admissiun al traffic sin via mo pli fin ils 31 da matg 2023. Possessuras novas e possessurs novs ston en mintga cas sa drizzar a l'Uffizi per il traffic sin via. A partir dal schaner 2023 vegn il formular respectiv per clientas e clients novs mess en l'internet.

La Regenza ha approvà in project da transfurmaziun dals locals da mastergn «Chesa Surtuor» da l'uniun MOVIMENTO a Samedan. L'uniun maina là ina chasa da dimora sco er in lavuratori protegì ed in center da di per persunas cun impediments. Purtadra è la proprietaria da l'immobiglia menziunada ed ella ha l'intenziun da duvrar questa immobiglia en il futur sco lavuratori protegì cun ina butia. Als custs totals dal project da transfurmaziun da 420 000 francs sa participescha il chantun cun ina contribuziun da maximalmain 320 000 francs.

Ils locals da mastergn sa chattan en il center dal vitg da Samedan. En il rom dal project qua avant maun duain els vegnir transfurmads uschia, ch'els pon vegnir duvrads senza barrieras. Plinavant èsi previs che la tessaria, la butia ed il magasin dal servetsch tecnic vegnan collocads en ils novs locals.

La Regenza ha approvà la revisiun parziala da la planisaziun locala, che la vischnanca da Samignun aveva concludì a la votaziun a l'urna dals 13 da mars 2022. Uschia ha ella stgaffì las premissas da la planisaziun d'utilisaziun per realisar ina deponia per material da stgavament net al lieu Val Musauna.

© Comet Photoshopping GmbH, Dieter Enz