La Regenza grischuna gratulescha cordialmain al cusseglier naziunal Martin Candinas per sia elecziun sco president dal Cussegl naziunal per la perioda d'uffizi 2022/2023. Suenter 37 onns daventa pia puspè in Grischun il «pli aut Svizzer». Mesemna, ils 30 da november 2022, ha lieu la festa uffiziala a Mustér. A las 14.00 è la populaziun envidada da sa participar al bainvegni ed a la festa.

Cura che Martin Bundi è vegnì elegì l'onn 1985 sco president dal Cussegl naziunal, aveva ses numalin Martin Candinas 5 onns. Ussa succeda l'um da 42 onns suenter 37 onns a Martin Bundi en la Chasa federala. Il politicher dal center Martin Candinas ha survegnì oz, al cumenzament da la sessiun d'enviern, 181 da 188 vuschs valaivlas ed è vegnì elegì sco president dal Cussegl naziunal per la perioda d'uffizi 2022/2023.

Dapi l'onn 1848 stat uschia per la 6avla giada in parlamentari dal chantun Grischun a la testa dal Cussegl naziunal. Ils antecessurs da Candinas avevan num Andreas Rudolf von Planta (1865/66), Andreas Bezzola (1885/86), Alfred von Planta (1913/14), Joseph Condrau (1956/57) e Martin Bundi (1985/86) ch'è gia vegnì menziunà al cumenzament. Cun Martin Candinas surpiglia gia il terz Grischun da la Surselva quest uffizi onuraivel.

Ambassadur da la lingua rumantscha
Candinas vesa sasez sco ambassadur e represchentant dal Grischun ed en spezial da la lingua rumantscha en la Chasa federala. Il spezialist per assicuranzas socialas vul profitar da l'onn presidial er per promover la discussiun da linguas, sco el communitgescha: «La diversitad da la Svizra cun sias quatter linguas naziunalas ma stat fermamain a cor.» Per il bab da trais uffants èn plinavant fitg impurtants ils interess da las regiuns da muntogna sco er dal turissem.

Dapi l'onn 2011 fa il Grischun part dal Cussegl naziunal. Avant è el stà durant 5 onns deputà dal Cussegl grond dal Grischun. Sco commember da la suprastanza da la Giuvna PCD Grischun da quella giada ha il Sursilvan cumenzà gia l'onn 1999 a politisar. Tar ils pli giuvens tutga el er en l'uffizi dal president dal Cussegl naziunal: La vegliadetgna media da tut las 201 presidentas e presidents dal Cussegl naziunal da fin ussa è 52,5 onns.

Festivitads cun la populaziun
Il chantun Grischun fa in bainvegni uffizial al nov president dal Cussegl naziunal en sia patria, la Surselva. A las 14.00 arriva il «pli aut Svizzer» accumpagnà da la cussegliera federala Viola Amherd a la staziun da Mustér. Lura vai en in til fin la baselgia claustrala da Mustér, nua che las festivitads han lieu. Suenter la part uffiziala è in aperitiv sin il program. La populaziun è envidada cordialmain da participar a las festivitads en la baselgia claustrala ed a l'aperitiv suandant. Persunas interessadas che na pon betg esser al lieu, han la pussaivladad da guardar il bainvegni uffizial da Mustér via livestream .

Suenter las festivitads a Mustér ha lieu la saira in'occurrenza per ils giasts envidads en la Halla da la citad a Cuira.

Fotografia agiuntada:

Download

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch

Responsabladad: Regenza