Il chantun Grischun e l'investider da finanzas Clean Energy Infrastructure Switzerland (CEIS) vulan collavurar en l'avegnir anc pli stretg sco acziunaris principals da la Repower SA e rinforzar vinavant lur rolla en l'acziunariat da l'interpresa d'energia grischuna.

Il chantun Grischun e CEIS èn interessads da s'engaschar a lunga vista a favur da la Repower. Els tegnan quint da las pussaivladads che sa dattan per la Repower sco interpresa dal provediment d'energia ch'è independenta, che vegn manada tenor princips da l'economia da manaschi, ch'è orientada a la rendita e che ha sia sedia en il chantun. Els han preschentà in a l'auter lur interess e vegnan a sa barattar en l'avegnir anc pli stretgamain en dumondas strategicas.

En il rom da las debattas davart la Strategia grischuna concernent la forza idraulica 2022–2050 han il Cussegl grond e la Regenza exprimì en il parlament grischun, ch'i saja ina finamira strategica da rinforzar la posiziun dal chantun – inclusiv quella da las vischnancas grischunas – en l'acziunariat da la Repower. Grazia a sia posiziun en l'economia d'energia ed a sia impurtanza per l'economia publica, per la politica regiunala e per l'economia da finanzas è la Repower ina interpresa grischuna impurtanta. In potenzial da svilup – ch'è er en l'interess dal chantun e da las vischnancas – resulta per l'interpresa plinavant en il rom da la realisaziun da la Strategia concernent la forza idraulica.

Per garantir en l'interess da la Repower a lunga vista la basa colleghiala da la cooperaziun dals acziunaris principals – numnadamain da las Ovras electricas dal chantun Turitg (EKZ), dal chantun Grischun e da CEIS – cuntinuescha la Regenza cun sias stentas sco fin ussa.

Infurmaziuns:

• Cusseglier guvernativ dr. Mario Cavigelli, schef dal Departament d'infrastructura, energia e mobilitad, e‑mail Mario.Cavigelli@diem.gr.ch
• Cusseglier guvernativ dr. Christian Rathgeb, schef dal Departament da finanzas e vischnancas, e‑mail Christian.Rathgeb@dfg.gr.ch

Responsabladad: Regenza