Las pitgas per siglientar lavinas ch'èn vegnidas installadas il november 2022 tranter Segl-Föglias e Plaun da Lej gidan ad augmentar considerablamain la segirezza dal traffic. Ussa realisescha l'Uffizi da construcziun bassa dal Grischun (UCB) supplementarmain in'emprova da pilot cun in nov sistem d'infurmaziun per las utilisadras ed ils utilisaders da quest traject da via.

DLas pitgas per siglientar lavinas ch'èn vegnidas installadas il november 2022 reduceschan la ristga da lavinas spontanas ed augmentan uschia la segirezza per las utilisadras ed ils utilisaders dal traject (guardar la communicaziun a las medias dals 22 da november 2022). Betg mo la segirezza, mabain er l'infurmaziun da las utilisadras e dals utilisaders da questa via ha gronda prioritad per il UCB.

Emprova da pilot cun nov sistem d'infurmaziun
Per quest intent realisescha il UCB quest enviern in project da pilot sin il traject tranter Segl e Malögia: A maun da tavlas al lieu infurmescha in sistem d'infurmaziun adattà gia ordavant las utilisadras ed ils utilisaders da la via davart eventualas serradas dal traject. Cun inditgar a temp las serradas prognostitgadas, vulan ins facilitar a las utilisadras ed ils utilisaders dal traject d'organisar lur viadi.

Il sistem d'infurmaziun funcziuna tenor in princip d'ampla da quatter stgalims. Las singulas fasas vegnan explitgadas en las legendas da las fotografias agiuntadas. Sche e quant svelt che las fasas respectivas sa midan, dependa fitg da l'aura actuala e da la prognosa da l'aura. En il center stat adina la segirezza da las utilisadras e dals utilisaders da las vias. Sche la periclitaziun actuala pretenda quai, poi en cas excepziunals per exempel er capitar, che l'ampla siglia directamain da verd sin cotschen, senza las fasas tranteren. Malgrà questas excepziuns pussaivlas duai l'emprova da pilot meglierar la situaziun vertenta per las utilisadras ed ils utilisaders da las vias, perquai ch'ellas ed els pon uschia organisar meglier lur viadi.

L'emprova da pilot cumplettescha il chanal d'infurmaziun enconuschent www.strassen.gr.ch ed è planisada per l'enviern 2022/2023. Suenter vegn il UCB ad analisar detagliadamain las emprimas experientschas ed a fixar l'ulteriur proceder.

Fotografias agiuntadas:

• Fasa verda: ins po charrar libramain. I n'èn prognostitgadas naginas serradas da la via.
• Fasa melna: entaifer las proximas 12 uras è ina serrada da la via pussaivla – la situaziun vegn observada criticamain.
• Fasa oranscha: ina serrada da la via è planisada. Las uras èn enconuschentas.
• Fasa cotschna: La via è actualmain serrada.

Infurmaziuns:

Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01, e-mail Reto.Knuchel@tba.gr.ch 

Responsabladad: Uffizi da construcziun bassa