Las lavurs da rumida suenter la bova tranter Castaneda e Molina han pudì vegnir terminadas pli baud che planisà. La via è averta dapi oz a las 16.00 sin in vial.
La rumida da la via da Calanca era vegnida prendida per mauns il mardi a mezdi nà da tuttas duas varts da la bova. Ussa han las lavurs pudì vegnir terminadas pli baud che planisà. Er las palissadas da protecziun da la vart da la muntogna èn gia installadas. La via è vegnida meglierada provisoricamain cun sablun grop ed è puspè vegnida averta oz a las 16.00 sin in vial.
L'Uffizi da construcziun bassa dal Grischun (UCB) sa resalva il dretg da serrar la via a curta vista, sche fermas precipitaziuns u novas crudadas da crappa avessan da periclitar la fin d'emna la segirezza stradala. Sin basa da las prognosas da l'aura vegn la cuvrida reparada previsiblamain mardi. Per las lavurs da cuvrida vegn il UCB a serrar la via durant circa duas uras.
Sin ina lunghezza da var 150 meters han crappuns cuvert la via la dumengia en damaun. Sin ina lunghezza da var 30 meters ha la crappa ch'è crudada giu, donnegià per part fermamain la via, ils mirs da sustegn da la vart da la muntogna e da la vart da la val sco er il cordun dal mir. Singuls crappuns èn crudads sur la via da Calanca fin giu en la Calancasca.
Fotografias agiuntadas:
Maletg: Uffizi da construcziun bassa dal Grischun
Infurmaziuns:
- Sven Fehler, manader Projectaziun/construcziun dal district 2 Mesauc, Uffizi da construcziun bassa, tel. +41 91 822 81 20, e‑mail Sven.Fehler@tba.gr.ch
- Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15, e‑mail Andrea.Peduzzi@tba.gr.ch
Responsabladad: Uffizi da construcziun bassa