L'Uffizi da migraziun e da dretg civil duai survegnir ina nova orientaziun. En quest connex datti ina midada en la direcziun da l'uffizi. Il manader d'enfin ussa Marcel Suter, che ha manà l'uffizi durant passa 11 onns e che ha lavurà en differentas posiziuns directivas da l'administraziun chantunala, è sa retratg per ils 12 da december 2022 da sia funcziun e prenda ina nova via professiunala.

La Regenza engrazia a Marcel Suter per ses servetschs prestads a favur dal chantun Grischun, particularmain er en connex cun la crisa en l'Ucraina. Tranter auter ha Marcel Suter gidà essenzialmain a realisar cun success la politica da migraziun e d'integraziun. Medemamain ha el manà durant plirs onns l'Associaziun da las autoritads chantunalas da migraziun.

La plazza sco manadra u manader da l'uffizi vegn publitgada proximamain. Fin che la plazza è occupada da nov, vegn il vicemanader da l'uffizi a manar l'uffizi en moda interimistica. Sut la nova direcziun vegn alura elavurada la nova orientaziun da l'uffizi. L'Uffizi da migraziun e da dretg civil duai metter in accent anc pli ferm sin ils servetschs per la populaziun estra e sin l'integraziun da tala.

Marcel Suter banduna l'administraziun chantunala en enclegientscha vicendaivla. Davart las modalitads han las partidas concludì da taschair. En cunvegnientscha cun il manader partent Marcel Suter stat il schef dal Departament da giustia, segirezza e sanadad, cusseglier guvernativ Peter Peyer a disposiziun per infurmaziuns.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 02, +41 79 629 00 85, e‑mail Peter.Peyer@djsg.gr.ch

Responsabladad: Regenza