Per la stagiun d'enviern 2022/23 fa l'Uffizi da construcziun bassa dal Grischun (UCB) quint – particularmain durant ils firads (Nadal e Bumaun) sco er durant il temp da vacanzas da mez schaner fin mez mars – cun in augment dal volumen da traffic per lung da las vias en las regiuns turisticas. In'emprova da pilot, sumeglianta a quella da la stad 2022 per lung da la via naziunala A13, duai meglierar la situaziun.

Il traffic turistic d'enviern vegn probablamain a pertutgar il pli fitg il traject inferiur da la via naziunala A28 cun las vischnancas da Schiers, Grüsch, Jenaz e Landquart sco er la vischnanca da Zizers e la citad da Cuira. Las enconuschientschas ch'ins ha obtegnì da l'emprova da pilot da la stad 2022 (communicaziun a las medias dals 3 d'october 2022) vegnan integradas en la planisaziun da las mesiras per la stagiun d'enviern 2022/23.

Tar il nuf stradal Landquart datti probablamain ina stagnaziun
In augment dal volumen da traffic spetgan ins cunzunt durant ils firads (Nadal e Bumaun) sco er durant sis fin set fins d'emna en la perioda da mez schaner fin mez mars. Quai dependa dentant fitg ferm da l'aura. Per il mument èsi perquai fitg difficil da far prognosas exactas. Il problem principal exista cunzunt la dumengia saira, cura che bleras viagiaturas e blers viagiaturs da temp liber sa mettan a medem temp sin il viadi da return davent dals territoris da skis. Il UCB parta dal fatg, che la capacitad dal nuf stradal Landquart (access A28 ad A13) en direcziun nord na vegnia betg ad esser suffizienta la dumengia saira. Consequentamain vegni probablamain a dar stagnaziuns sin la A13 fin Cuira sco er sin la A28 fin Jenaz.

Bloccar las sortidas è l'emprima mesira
Per minimar questas stagnaziuns ha il UCB – ensemen cun l'Uffizi federal da vias (UVIAS) e cun la Polizia chantunala dal Grischun ed en dialog cun las vischnancas pertutgadas – elavurà in concept che sa basa sin differents scenaris. Las mesiras correspundentas duain vegnir prendidas tenor la situaziun.
L'emprima fasa è previsa per la midada da l'onn 2022/23 e cumenza ils firads (Nadal e Bumaun). En il focus stattan cunzunt la part davant dal Partenz e la bloccada da diversas sortidas sco Jenaz, Schiers, Seewis, Ganda e Landquart. Questas bloccadas èn pussaivlas, perquai che questas vischnancas han pliras sortidas. L'access a la populaziun locala è uschia anc adina garantì. Ultra da quai èn previsas mesiras a la sortida Rappagugg a Zizers ed en la citad da Cuira, quai per minimar il traffic da camiuns tras las vischnancas da Zizers e da Landquart.

Tegnair liber las zonas d'abitadi dal traffic da transit
La finamira da las mesiras che vegnan prendidas per lung da la A28 e da la A13 èn en emprima lingia quellas, da tegnair liber las zonas d'abitadi dal traffic da transit. A medem temp duai vegnir garantida la circulaziun dal traffic per lung da la A13 e da la A28 (nagin traffic stagnant). Per quest intent sto vegnir garantida ina circulaziun omogena cun uschè paucs disturbis sco pussaivel. Ina sfida è qua tranter auter il grond dumber da sortidas e d'access. In'ulteriura attenziun merita la stabilitad dals uraris dal traffic public. Analogamain a la stad surveglia il UCB las mesiras per obtegnair ulteriuras enconuschientschas per ils pass da realisaziun futurs. Ultra da quai han ins l'intenziun da lantschar ina campagna da sensibilisaziun per ils giasts dal di.

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01, e‑mail Reto.Knuchel@tba.gr.ch
• Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62, e‑mail Andreas.Poehl@tba.gr.ch

Responsabladad: Uffizi da construcziun bassa

Infurmaziuns cumplementaras: Co resultan stagnaziuns dal traffic?

Il problem principal da stagnaziuns dal traffic è in problem da saturaziun. 1 kilometer via è in spazi limità che stat a disposiziun als autos. La capacitad dad 1 kilometer via cumpiglia 1500 fin 1800 vehichels per ura e per vial, sch'ils autos sa movan cun ina sveltezza dad 80 fin 100 kilometers per ura. Sch'els van pli svelt e pli plaun, sa reducescha questa capacitad. Il problem da saturaziun cumenza, cura che la dumonda da quest spazi è pli gronda che la purschida da spazi. La mesadad da las stagnaziuns dal traffic vegn fatga da las manischunzas e dals manischunzs sezs: Pli spess ch'il traffic sin las vias è e pli savens ch'ils autos frainan. Mintga pitschna cumplicaziun po chaschunar ina stagnaziun. Pia per exempel cun s'avischinar memia fitg a l'auto precedent. L'auto che vegn suenter sto medemamain franar, e quai pli fitg che quai che fiss necessari, sch'el observass la distanza. Er il terz auto fraina per evitar ina collisiun da davos. La sveltezza vegn uschia reducida fermamain e sa diminuescha permanentamain vinavant. Ina stagnaziun è resultada, senza ch'igl avess existì in obstachel per propi u senza ch'igl avess dà in accident. Mintgina e mintgin gida cun ses cumportament da mobilitad persunal a meglierar la situaziun da traffic regiunala – saja quai cun sia decisiun per il tip da mobilitad, cun il mument da sia partenza u cun ses cumportament sin via.