Il 1. da schaner 2023 cumenza a Roveredo ina nova perioda da legislatura. Ils pli novs svilups sveglian la buna speranza che la vischnanca da Roveredo dumognia en il futur sias incumbensas multifaras e pretensiusas senza il sustegn da la Regenza u da terzas varts.

Ils 23 d'october 2022 èn stadas a Roveredo las elecziuns communalas per la perioda da legislatura 2023–2026. Sco president communal è vegnì elegì l'advocat Gianpiero Raveglia. Tant per la suprastanza communala sco er per la cumissiun da gestiun èn sa fatgas valair cumplettamain e cleramain las candidaturas da la gruppaziun «6535 Insieme». Ils uffizials novelegids accentueschan ch'els veglian ademplir lur responsabladad envers la populaziun da Roveredo e ch'els vegnian ad agir en l'interess dal bainstar general. La Regenza parta dal fatg che las normas e reglas elementaras, ch'èn necessarias per ch'ina autoritad politica funcziunia, vegnian ussa observadas. Quai èn particularmain il respect e la maniera in vers l'auter sco er l'observaziun dal secret d'uffizi e dal princip colleghial.

Il cumissari da la Regenza stat a disposiziun a la suprastanza durant in temp limità
Il mandat da la Regenza, ch'è vegnì adattà e che vala mo durant in tschert temp, attribuescha ina rolla limitada al cumissari da la Regenza. Il cumissari da la Regenza po gidar a facilitar la lavur da las novas autoritads communalas. La Regenza autorisescha l'advocat Claudio Lardi da sustegnair la nova suprastanza durant in curt temp transitoric en dumondas che pertutgan la gestiun e l'organisaziun da la vischnanca. El surpiglia la rolla d'in observatur. En cas da basegn po el dar buns cussegls e far recumandaziuns utilas. Il mandat è limità fin la fin da mars 2023. Questa prolungaziun vegn considerada sco mesira da durada limitada, che duai permetter a la Regenza da confermar il return definitiv da la vischnanca da Roveredo a la normalitad en la politica ed en l'administraziun.

La Regenza exprima sia confidenza als commembers da las autoritads e spera che la lunga crisa instituziunala a Roveredo tutgia ussa al passà.

Infurmaziuns:

• Cusseglier guvernativ Dr. Christian Rathgeb, schef dal Departament da finanzas e vischnancas, tel +41 81 257 32 01, e‑mail Christian.Rathgeb@dfg.gr.ch
• Thomas Kollegger, manader da l'Uffizi da vischnancas, tel. +41 81 257 23 81, e‑mail Thomas.Kollegger@afg.gr.ch
• Claudio Lardi, cumissari da la Regenza per la vischnanca da Roveredo, tel +41 79 610 44 55, e‑mail avvocato@claudiolardi.ch

Responsabladad: Regenza