L'analisa gratuita da la situaziun professiunala per persunas da 40 onns e dapli, «viamia», vegn manada vinavant. Suenter ina fasa da pilot dad 1 onn ha il chantun Grischun suttascrit la cunvegna da program 2023–2024 cun la Confederaziun.

Il mund da lavur sa mida svelt. Novs models da lavur (New Work), il progress tecnologic e la digitalisaziun contribueschan a quai. Per mantegnair las schanzas sin il martgà da lavur fin il pensiunament, ston ins concepir activamain l'atgna carriera. Las lavurantas ed ils lavurants a partir da 40 onns duain far regularmain in'analisa da la situaziun. Lur situaziun professiunala e persunala duai vegnir analisada e reflectada resguardond ils basegns dal martgà da lavur che sa midan. Uschia pon ellas ed els eruir a temp las proximas midadas professiunalas e lur eventual basegn da furmaziun supplementara sco er planisar ils pass persunals per mantegnair las schanzas sin il martgà da lavur. Per quest motiv subvenziunescha la Confederaziun il svilup e l'implementaziun da la purschida gratuita «viamia». La realisaziun da las mesiras federalas e la coordinaziun intrachantunala èn chaussa dals chantuns.

Success durant la fasa da pilot en il Grischun
En il Grischun è l'Uffizi per la furmaziun professiunala cun ses otg posts regiunals da la Cussegliaziun da professiun, da studi e da carriera responsabel per il process da cussegliaziun. Durant la fasa da pilot l'onn 2022 han var 130 persunas en il Grischun fatg diever da la purschida gratuita «viamia». Las persunas che fan diever da «viamia» absolvan en in emprim pass in uschenumnà «Employability-Check». En quest test vegn fatga in'autovalitaziun da las schanzas sin il martgà da lavur. Ils resultats dal test servan sco basa per l'analisa da la situaziun. En quella vegnan eruids la situaziun persunala e professiunala sco er in eventual basegn d'agir. Ensemen cun ina cussegliadra u in cussegliader da carriera sviluppa e planisescha la clienta u il client alura mesiras concretas per mantegnair u per meglierar sias schanzas sin il martgà da lavur. Il chantun ha decidì da suttascriver danovamain la cunvegna da program cun la Confederaziun mo, sche las mesiras da promoziun naziunalas han lieu en tut las quatter linguas naziunalas, pia er en rumantsch.

Spetgads vegnan 400 clientas e clients entaifer dus onns
Per mintga persuna che vegn cussegliada èn previs custs pauschals da 1200 francs. Quels vegnan finanziads per 80 pertschient da la Confederaziun e per 20 pertschient dal chantun. Per realisar il project na resultan per il chantun Grischun ni custs supplementars ni in basegn supplementar da persunal. «La cussegliaziun dals 300 fin 400 cas spetgads po vegnir fatga cun las resursas existentas», ha declerà Curdin Tuor, manader da l'Uffizi per la furmaziun professiunala. La purschida stat a disposiziun a tut las persunas da 40 onns e dapli che abitan en il chantun Grischun e che n'han betg il dretg da purschidas da scleriment e da cussegliaziun cumparegliablas da las assicuranzas socialas e da l'agid social.

Ulteriuras infurmaziuns davart «viamia» èn publitgadas sin las paginas d'internet dal Secretariat da stadi per furmaziun, retschertga ed innovaziun e da l'Uffizi per la furmaziun professiunala.

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02 (cuntanschibel da las 14.30 fin las 15.30), e‑mail Jondomenic.Parolini@ekud.gr.ch
• Petra Wyss,manadra da la partiziun Cussegliaziun da professiun, da studi e da carriera, Uffizi per la furmaziun professiunala, tel. +41 81 257 27 05 (cuntanschibla da las 12.00 fin las 14.00), e‑mail Petra.Wyss@afb.gr.ch

Responsabladad: Regenza