Dapi 10 onns porscha l'Autoritad per la protecziun d'uffants e da creschids (APUC) sustegn a persunas ch'èn en situaziuns da vita difficilas. La cumposiziun interdisciplinara da l'autoritad ha gidà a professiunalisar fundamentalmain l'elavuraziun dals cas. Avant la fundaziun da la APUC e fin l'onn 2012 ordinavan las autoritads communalas da milissa u da laics che vegnivan elegidas tras in act politic, las mesiras tutelaras en grondas parts da la Svizra – uschia er en il Grischun.

La retrospectiva sin 10 onns Autoritad per la protecziun d'uffants e da creschids (APUC) en il Grischun è positiva. Dapi la fundaziun da la APUC l'onn 2013 han las tschintg filialas en il Grischun elavurà professiunalmain passa 31 000 proceduras. Ensemen cun las procuraturas ed ils procuraturs engaschads accumpognan e sustegnan las collavuraturas ed ils collavuraturs da la APUC dal Grischun uffants e persunas creschidas che dovran agid. La APUC analisescha la situaziun ed ordinescha mesiras, sche quai è necessari. Il spectrum da las mesiras cumpiglia davent da curatellas adattadas individualmain, sur agids d'educaziun fin – en cas fitg rars – la privaziun da persunas creschidas da l'abilitad d'agir u collocaziuns d'uffants e da giuvenils en lieus esters.

Ina finamira impurtanta da la revisiun da la lescha l'onn 2013 è stada la promoziun da l'autodeterminaziun da las persunas pertutgadas. Tenor quest princip prendan las collavuraturas ed ils collavuraturs da la APUC oz las mesiras ch'èn adattadas a las differentas situaziuns da vita. Per giuditgar ils basegns da la clientella guarda la APUC adina da chattar la soluziun la pli raschunaivla e la pli pauc rigurusa per sustegnair las persunas pertutgadas. Las decisiuns pon vegnir contestadas giuridicamain, sche las persunas pertutgadas n'èn betg d'accord cun ellas.

Var dus terzs da tut las persunas che vegnan sustegnidas tras la APUC u tras las procuraturas ed ils procuraturs, èn persunas creschidas basegnusas. En blers cas èn quai persunas pli veglias cun ina malsogna da demenza, che dovran ina procuratura u in procuratur che regla lur situaziun finanziala. In ulteriur terz dals cas tractads pertutga uffants. En quest connex fan ils geniturs savens dispita, per exempel pervia dal dretg da visita. Tematisada vegn dentant er la violenza a chasa tranter ils geniturs en preschientscha dals uffants.

Cura che la APUC survegn in'annunzia ch'in uffant u ch'ina persuna creschida è basegnus u periclità, sclereschan las collavuraturas ed ils collavuraturs da la APUC, sche ed en tge furma ch'i dovra sustegn e protecziun. En circa in terz da tut las annunzias che entran n'ordinescha la APUC naginas mesiras suenter quests scleriments. Las persunas pertutgadas pon gidar sasezzas u èn prontas da prender mesiras sin basa voluntara. La APUC guarda che las persunas pertutgadas possian viver lur vita vinavant en moda uschè independenta ed autodeterminada sco pussaivel.

S'engaschar per las persunas las pli deblas
Las collavuraturas ed ils collavuraturs da la APUC s'occupan di per di da las relaziuns e dals basegns da las persunas ch'èn en situaziuns da vita per part fitg difficilas. Matthias Tscharner, il manader da la APUC dal Grischun, considerescha l'Autoritad per la protecziun d'uffants e da creschids perquai er sco in corp da pumpiers socials. Las incumbensas portian savens grondas sfidas per las collavuraturas ed ils collavuraturs da la APUC. La lavur en il team interdisciplinar saja dentant er fitg interessanta, multifara ed in enritgiment.

Las retegnientschas en la populaziun da contactar l'autoritad da protecziun sajan dentant anc adina fitg grondas. Malgrà la meglra chapientscha per la lavur da la APUC existian anc adina temas. La APUC dal Grischun vul eliminar quellas. «La finamira da tut nossas collavuraturas e noss collavuraturs èsi da dar a las persunas pertutgadas – en mintga discurs u cun mintga mesira – la confidenza en nossa lavur. Uschia vulain nus er mussar pass per pass, co che nus lavurain e che nus ans engaschain per las persunas las pli deblas», uschia Matthias Tscharner, il manader da la APUC dal Grischun.

Infurmaziuns:

Matthias Tscharner, manader da la APUC dal Grischun, tel. +41 81 257 52 95 (cuntanschibel fin las 16.00), e‑mail graubuenden@kesb.gr.ch

Responsabladad: APUC dal Grischun