La Regenza ha approvà l'engrondiment dal campadi «Gravas» en la fracziun Lai ed ha dà glisch verda a la realisaziun dal parc da mastergn a Schiers cun la pussaivladad d'utilisar quel per occurrenzas culturalas e da sport.
Il campadi «Gravas» a Lai po vegnir engrondì
La Regenza ha approvà la revisiun parziala da la planisaziun locala che
la vischnanca da Vaz aveva concludì ils 15 da matg 2022. Uschia ha ella stgaffì
la premissa per engrondir il campadi «Gravas» en la fracziun Lai.
Tenor il nov giudicament da la situaziun da
privel èn var 0,6 hectaras respectivamain 27 plazzas da staziunament en la
zona da privel 1 u 2 e na dastgan per motivs da segirezza betg pli
vegnir duvradas per campar. Perquai che la dumonda da campadis è vinavant
gronda, duain vegnir remplazzadas las plazzas da staziunament che crodan davent
sco er vegnir engrondida la purschida. Il project d'engrondiment prevesa en
emprima lingia plazzas da staziunament per passants. Almain 80 pertschient da
questas plazzas dastgan esser occupadas durant maximalmain 30 dis senza
interrupziun e fin 20 pertschient dad ellas durant maximalmain 6 mais.
D'ina
vart èsi planisà d'extender la purschida da campar e da l'autra vart da
construir in nov edifizi da manaschi e d'infrastructura central. L'edifizi da
manaschi existent duai vegnir transfurmà e vegnir duvrà en l'avegnir sco local
da skis e da velos u sco deposit. Ultra da quai è previsa ina nova plazza da
dismessa dasper l'entrada dal campadi. En connex cun l'engrondiment vegn reglà
da nov er l'access al campadi «Gravas» e dischlocada la loipa da passlung
existenta. Per quest intent sto vegnir construida ina nova punt sur l'Aua da
Sanaspans. La vischnanca burgaisa vul realisar ina punt demontabla che vegn
installada mo durant la stagiun d'enviern.
©Comet Photoshopping GmbH, Dieter Enz
La Regenza ha approvà la revisiun parziala da la planisaziun locala che
la vischnanca da Vaz aveva concludì ils 15 da matg 2022. Uschia ha ella stgaffì
la premissa per engrondir il campadi «Gravas» en la fracziun Lai.
Glisch verda per il parc da mastergn cun pussaivladad d'utilisar quel per occurrenzas culturalas e da sport
La Regenza ha approvà la
revisiun parziala da la planisaziun locala che la vischnanca da Schiers aveva
concludì ils 25 da settember 2022. Uschia ha ella stgaffì la premissa
planisatorica per realisar in parc da mastergn sin l'areal «Under
em Bahnhof» cun la pussaivladad supplementara d'utilisar quel per occurrenzas
culturalas e da sport. Cun ina purschida da localitads multifara per
l'industria e per occurrenzas duai il project, ch'è planisà en proxima
vischinanza da la staziun da Schiers, tegnair quint da la dumonda e da
l'interess public en la regiun.
La Regenza ha approvà la revisiun parziala da la planisaziun locala che la vischnanca da Schiers aveva concludì ils 25 da settember 2022. Uschia ha ella stgaffì la premissa planisatorica per realisar in parc da mastergn sin l'areal «Under em Bahnhof» cun la pussaivladad supplementara d'utilisar quel per occurrenzas culturalas e da sport.
