Il chantun Grischun po festivar in term impurtant da la mesiraziun uffiziala: Suenter 110 onns è l'entira surfatscha dal chantun mesirada e documentada.

Tant ils edifizis sco er las vias, ils prads, ils guauds, ils lais ed ils glatschers – a partir d'immediat è l'entira surfatscha dal chantun Grischun mesirada. Suenter il chantun Uri è il chantun Grischun il segund chantun da muntogna ch'è reussì da far quai. E quai bainchapì sco pli grond chantun svizzer cun 7105 kilometers quadrat.

Utilisaziun multifara
Mintga di utilisain nus uschenumnadas geodatas, en ils blers dals cas schizunt nunconscientamain, sco per exempel cura che nus inditgain ina ruta en l'apparat da navigaziun u cura che nus tschertgain il num d'in piz. Sco basa per quai servan las datas da la mesiraziun uffiziala, las qualas l'Uffizi d'agricultura e da geoinfurmaziun ha rimnà e publitgà en collavuraziun cun inschigners geometers privats. «Tras datas fidadas cun relaziun locala e tras ils sistems che sa basan sin quellas daventan las bleras decisiuns da l'economia e da la politica pli facilas, pli sveltas e pli segiras», accentuescha il cusseglier guvernativ Marcus Caduff. Las spezialistas ed ils spezialists da la mesiraziun ch'èn savens da viadi cun lur stativs ed instruments da mesiraziun, furneschan datas impurtantas per l'entira economia publica.

• La mesiraziun uffiziala registrescha cunfins da bains immobigliars, per che quels possian vegnir inscrits en il register funsil e per che la proprietad possia vegnir garantida.
• Las datas servan sco basa per ils sistems d'infurmaziun geografics (SIG) ed èn uschia in agid d'orientaziun tar differents projects e tar consultaziuns da persunas privatas, da l'economia, da la perscrutaziun e da l'administraziun.
• Las adressas dals edifizis ch'èn cuntegnidas en quellas, furneschan la pli impurtanta basa per ils sistems da navigaziun. Da quai na profiteschan betg mo las persunas privatas ed ils servetschs da furniziun. Er ils servetschs da salvament survegnan qua tras in agid per chattar svelt in edifizi.
• Ils plans e las chartas da basa che vegnan deducids directamain da la mesiraziun uffiziala, servan a la planisaziun dal territori, per exempel per plans locals u da zonas u per planisaziuns da construcziun e da traffic.

Dapi 110 onns vegni mesirà
Il fundament per ina mesiraziun sistematica è vegnì mess l'onn 1912, cura ch'il Cudesch civil svizzer è vegnì introducì. Il spiert da pionier d'ina mesiraziun da tut la surfatscha è però vegnì franà considerablamain tras l'Emprima e la Segunda Guerra mundiala. Ils geometers da quella giada eran anc lunsch davent d'ina mesiraziun da l'entira Svizra.

Per in schlantsch han procurà pli tard differentas adattaziuns da leschas sco er la digitalisaziun che vegniva utilisada en la mesiraziun uffiziala gia durant ils onns 1970. Novs instruments ed agids da calculaziun pussibiliteschan, ch'ils geometers pon lavurar en moda effizienta. Cumbain che l'entir Grischun è mesirà suenter 110 onns, ston las basas er en l'avegnir adina puspè vegnir renovadas e meglieradas cun novas tecnologias, sco per exempel cun models da 3D.

Ulteriuras infurmaziuns e contexts chattais Vus sin la pagina d'internet da l'Uffizi d'agricultura e da geoinfurmaziun.

Fotografia agiuntada:

©Grünenfelder und Partner AG

Infurmaziuns:

Hans Andrea Veraguth, manader da la partiziun Mesiraziun / geometer chantunal, Uffizi d'agricultura e da geoinfurmaziun, tel. +41 81 257 24 32, e‑mail Hans-Andrea.Veraguth@alg.gr.ch

Responsabladad: Uffizi d'agricultura e da geoinfurmaziun