La Regenza ha garantì ina contribuziun chantunala da 65 810 francs a l'uniun Pro Svizra Rumantscha per il project digital «Programs da correctura ortografica rumantscha». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun 239 310 francs.

Il project cumpiglia l'elavuraziun sistematica da las datas linguisticas sco er – sin basa da quai – la realisaziun da sis programs da correctura ortografica en ils tschintg idioms ed en rumantsch grischun. Quests programs servan a las scolas, a las administraziuns, a las medias, a las interpresas, a las persunas che lavuran sin il champ cultural, ma er al vast public, sco basa impurtanta per duvrar il rumantsch en moda uschè cumplessiva sco pussaivel sco lingua da scrittira en il mintgadi. Las materialias elavuradas (datas linguisticas e software) stattan a disposiziun a la publicitad sut ina licenza libra per ulteriuras applicaziuns e per futuras actualisaziuns.

La Regenza ha garantì a la Gammeter Media SA ina contribuziun chantunala da maximalmain 71 400 francs per il project «vaidrina plus». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project digital custa tut en tut 190 400 francs.

Dapi 2 onns fan las vischnancas da l'Engiadin'Ota lur publicaziuns uffizialas – supplementarmain a la publicaziun en la «Engadiner Post/Posta Ladina» – er sin la plattafurma digitala «info.engadin.online». Cun il project «vaidrina plus» duai la plattafurma existenta vegnir transfurmada en ina «vaidrina» (vitrina). Il «plus» signalisescha, ch'i duai dar da nov ina plattafurma da communicaziun participativa tranter la populaziun (indigens e giasts) e las vischnancas da l'Engiadin'Ota, cun infurmaziuns communalas supplementaras e cun ulteriuras pussaivladads da dialog en il spazi digital. Las vischnancas survegnan uschia in instrument che sustegna la transfurmaziun digitala da la communicaziun communala e che promova las cumpetenzas digitalas da las collavuraturas e dals collavuraturs. Sco plattafurma regiunala promova «vaidrina plus» plinavant il barat politic sur ils cunfins communals or.

Ulteriuras infurmaziuns: https://grdigital.digital

© gammetermedia

La Regenza ha garantì ina contribuziun chantunala da 19 000 francs a la regiun Partenz/Tavau per il project digital «Offensiva da furmaziun marketing digital». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun circa 42 000 francs.

Ils purtaders dal project vulan scolar en spezial interpresas pitschnas e mesaunas ed uniuns en la regiun Partenz/Tavau en il sectur «marketing digital», e quai a maun d'ina plattafurma d'emprender. Er il program da curs duai vegnir adattà spezialmain als basegns da la gruppa en mira. Suenter la fasa da pilot en la regiun Partenz/Tavau duai questa plattafurma vegnir rendida accessibla er ad autras regiuns dal Grischun. 

Ulteriuras infurmaziuns: https://grdigital.digital

© Gemeinde Davos

Team inizial dal project «Digitalkick» en il nov biro cumpartì a Tavau: Werner Bär, president da la regiun Partenz/Tavau; Valérie Favre Accola, manadra dal svilup regiunal Partenz/Tavau; Philipp Wilhelm, president communal da Tavau