En il chantun Grischun stoi vegnir controllà periodicamain, sche las incumbensas publicas èn necessarias, efficazias e finanziablas. L'onn passà ha la Regenza fatg in'examinaziun cumplessiva da las incumbensas e da las prestaziuns (EIP) e deliberà tut en tut 193 mesiras d'optimaziun per l'ulteriura elavuraziun.
Tenor la Constituziun dal chantun Grischun stoi vegnir controllà periodicamain, sche las incumbensas publicas èn necessarias, efficazias e finanziablas. L'examinaziun periodica e sistematica da las incumbensas statalas duai per l'ina procurar ch'i vegnia desistì d'incumbensas nunnecessarias, e per l'autra garantir che las incumbensas necessarias vegnian ademplidas en moda effectiva ed effizienta. En il center da l'interess stat la dumonda, co che las resursas persunalas e finanzialas che stattan a disposiziun pon vegnir impundidas en moda raschunaivla ed efficazia. In'examinaziun critica da las incumbensas statalas e dal basegn da resursas correspundentas è ultra da quai er stada il cuntegn da differentas intervenziuns en il Cussegl grond.
Examinaziun cumplessiva da las incumbensas e da las prestaziuns
En ils departaments ed en ils uffizis è la EIP vegnida realisada sin il stgalim da las partiziuns. Tut en tut èn uschia vegnidas examinadas 156 unitads. Las unitads administrativas ch'exequeschan exclusivamain dretg federal e che vegnan finanziadas cumplainamain da la Confederaziun n'èn betg stadas object da la EIP. Er las dretgiras chantunalas ed ils instituts autonoms da dretg public (Cassa da pensiun dal Grischun, Banca Chantunala Grischuna, Servetschs psichiatrics dal Grischun, Assicuranza d'edifizis dal Grischun, Institut d'assicuranza sociala dal Grischun) n'èn betg vegnids resguardads en l'examinaziun.
Optimaziuns ed augments d'effizienza gia cuntanschids
L'adempliment da las incumbensas dals posts da servetsch è suttamess ad ina dinamica pli e pli intensiva. La quantitad d'incumbensas e las pretensiuns qualitativas èn s'augmentadas tut en tut pli fitg ch'ils meds finanzials e persunals che stattan a disposiziun. Ils ultims onns ha l'administraziun chantunala perquai gia fatg cuntinuadamain meglieraziuns, optimaziuns da process u reorganisaziuns. Da numnar èn per exempel restructuraziuns tar l'Uffizi da migraziun e da dretg civil, tar la Procura publica u tar l'Uffizi per la scola populara ed il sport. Ultra da quai èn vegnids digitalisads differents andaments e process entaifer l'administraziun. Da menziunar è en quest connex cunzunt il project «Ulteriur svilup da la gestiun electronica da las fatschentas (GEVER)» che vul digitalisar per gronda part las relaziuns commerzialas internas da l'administraziun chantunala. Cun quai vul el contribuir ad ina collavuraziun pli effizienta e pli simpla tranter ils differents posts da servetsch.
La Regenza ha deliberà tut en tut 193 mesiras per l'ulteriura elavuraziun
En il rom da l'examinaziun da las incumbensas e da las prestaziuns ha la Regenza deliberà tut en tut 193 mesiras d'optimaziun. La gronda part da las mesiras è vegnida dada liber per ina realisaziun directa. Tschertas mesiras, cunzunt mesiras che cumpiglian pliras organisaziuns, dovran dentant in'examinaziun pli detagliada per pudair vegnir realisadas. Las unitads administrativas cumpetentas vegnan a far l'analisa respectiva fin mez da l'onn 2023. Las mesiras ch'èn lura vegnidas valitadas sco degnas, vegnan realisadas silsuenter.
Mesiras pli pitschnas e mesiras operativas che pon vegnir implementadas svelt e senza bler temp da preparaziun, vegnan realisadas immediatamain. Singulas mesiras pretendan ina midada da l'ordinaziun u da la lescha e dovran perquai ina fasa da realisaziun pli lunga. En tals cas pon ins er s'imaginar da las realisar en il rom dal Program da la Regenza 2025–2028.
Pertutgant las singulas mesiras vegni renvià al rapport agiuntà.
Agiuntas:
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel a partir da las 16.00), e-mail Martin.Buehler@dfg.gr.ch
Responsabladad: Regenza