Venderdi, ils 24 da favrer, èsi in onn che la Russia ha attatgà l'Ucraina cuntrari al dretg internaziunal. En vista a quest trist fatg engrazia la Regenza a la populaziun grischuna per la gronda solidaritad ch'ella ha demussà a las fugitivas ed als fugitivs sco er a las victimas da guerra. A questas persunas garantescha il chantun vinavant ses sustegn.

La guerra en l'Ucraina ha mess en fugia milliuns persunas. En il Grischun mussa la populaziun ina gronda solidaritad cun las famiglias pertutgadas da la guerra. Numerusas fugitivas e numerus fugitivs èn vegnids retschavids tar persunas privatas. La Regenza engrazia a la populaziun per questa gronda prontezza da gidar e renconuscha las grondas stentas da persunas privatas en connex cun l'agid a fugitivas e fugitivs en dumondas administrativas e quotidianas.

Confamigliars, amias ed amis, scolas, vischnancas, baselgias, uniuns e patruns surpiglian dapi adina ed en general ina rolla centrala en connex cun il sustegn e cun l'integraziun da persunas estras. Grazia a lur prontezza da s'occupar cun autras realitads da vita, han il Grischun e la Svizra pudì retschaiver ed integrar cun success persunas da bleras regiuns dal mund e da numerusas naziuns en guerra durant ils moviments da fugia dals decennis passads. En il rom da sias pussaivladads vegn il chantun Grischun er vinavant a gidar persunas ch'èn pertutgadas da grevs eveniments da guerra u da catastrofas da la natira.

Gronda chapientscha per fugitivas e fugitivs
«La situaziun malsegira en bleras regiuns dal mund è – en vista als moviments da fugia – er in'obligaziun da gidar per nus che dastgain viver en structuras democraticas che funcziunan bain, en segirezza ed en bainstanza», di il president da la Regenza Peter Peyer per commemorar las victimas da conflicts armads e da catastrofas da la natira, sco il terratrembel en Siria ed en Tirchia. «Nus essan leds che nus pudain quintar cun tanta chapientscha per las fugitivas ed ils fugitivs tar la populaziun, e che nus pudain uschia dar dumogn a las sfidas.»

Infurmaziuns:

President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch

Responsabladad: Regenza