Il manader da l'Uffizi da persunal, Fernando Guntern, banduna l'administraziun chantunala. Sia plazza vegn publitgada en il decurs da las proximas emnas.

Fernando Guntern e la Regenza èn vegnids cuminaivlamain a la conclusiun, ch'els hajan differentas ideas davart la direcziun e l'avegnir da l'Uffizi da persunal. Els èn perquai sa cunvegnids en enclegientscha da terminar la relaziun da lavur existenta e da dispensar Fernando Guntern da sias incumbensas per la fin da favrer. La Regenza vegn a publitgar la plazza dal manader d'uffizi en il decurs da las proximas emnas.

Fernando Guntern ha manà l'Uffizi da persunal dal chantun Grischun dapi il 1. da schaner 2020. Ultra da sias incumbensas regularas sco per exempel la revisiun parziala reussida da la Lescha da persunal, ha el durant ses temp d'uffizi er dumagnà las numerusas sfidas en connex cun la pandemia da COVID-19, particularmain la realisaziun da las mesiras dal Cussegl federal tenor il dretg da lavur. La Regenza engrazia a Fernando Guntern per la lavur ch'el ha prestà per il chantun Grischun.

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 14.00 fin las 16.00), e‑mail Martin.Buehler@dfg.gr.ch

Responsabladad: Regenza