L'emprima badigliada lantscha il cumenzament uffizial da las lavurs da construcziun per il center da la polizia stradala da la Polizia chantunala sper l'access a l'autostrada Cuira Sid. La realisaziun da l'ovra da construcziun vegn a durar circa in onn e mez. Igl è planisà da prender en funcziun la chasa l'atun 2024.
Il project victur «FAR» sa distingua tant tras sia persistenza e funcziunalitad sco er tras sia concepziun architectonica remartgabla. Planisà e realisà vegn il project da construcziun dal team da planisaders generals Comamala Ismail Architectes da Delémont ed Andreas Lütscher Baumanagement SA da Haldenstein/Cuira.
Pussaivladads d'intervegnir svelt per la Polizia chantunala
Cun la nova basa vegn il provediment tras la polizia da traffic garantì davent da Maiavilla fin a la Viamala. Ultra da quai vegnan ils process manaschials optimads tras l'infrastructura che po vegnir utilisada en moda flexibla. Pertutgant la strategia da traffic ha il lieu cun access direct a l'autostrada ina posiziun ideala per in manaschi effizient cun curts temps d'intervenziun da las forzas d'acziun da la Polizia chantunala.
Project exemplaric per la construcziun persistenta
L'edifizi nov è vegnì lantschà en il rom dal Plan d'acziun «Green Deal per il Grischun» e vegn realisà sco project exemplaric en il sectur da la construcziun persistenta. L'edifizi cumpact en furma da tur dat en egl pervia da ses elements stgirs ch'al circumdeschan, ch'èn levamain elevads e che consistan da singuls moduls da fotovoltaica. La realisaziun sco edifizi da netto nulla cun il standard Minergie-A-Eco demussa ina moda da construcziun ch'è effizienta areguard l'energia, che schanegia las resuras e che cumpiglia er la producziun d'energia solara, low-tech, suffizienza (spargnar energia e material), economia circulara sco er in microclima optimà.
La persistenza da la construcziun sa referescha a l'entir ciclus vital da l'edifizi e s'extenda uschia da la projectaziun sur la realisaziun, il manaschi, la gestiun fin a la demontascha. Grazia ad ideas innovativas schanegia l'edifizi nov las resursas, reducescha las grevezzas per l'ambient e promova la biodiversitad.
Il credit da 9,8 milliuns francs per la construcziun dal center da la polizia stradala ha il Cussegl grond approvà en sia sessiun da l'avrigl 2022. Las emprimas publicaziuns uffizialas per quest project da construcziun èn vegnidas fatgas l'atun 2022. Tar las surdadas da las lavurs per la construcziun brutta e per la tecnica da chasa han pudì vegnir resguardadas per gronda part interpresas localas.
Visualisaziun:
© Comamala Ismail Architectes
Agiuntas:
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 ((cuntanschibla da las 12.00 fin las 13.30), e‑mail Carmelia.Maissen@diem.gr.ch
- Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 12.00 fin las 13.30), e‑mail Andreas.Kohne@hba.gr.ch
Responsabladad: Uffizi da construcziun auta