Suenter Pasca cumenza la stagiun da construcziun 2023. Sin la rait da vias chantunalas da stgars 1360 kilometers planisescha l'Uffizi da construcziun bassa dal Grischun (UCB) tut en tut 158 plazzals.

Cun 158 plazzals sa mova il UCB quest onn en in rom sumegliant sco l'onn 2022, quai èn dentant en media main plazzals ch'ils ultims sis onns.Trais projects pli gronds da vias principalas stattan en il focus durant questa stagiun: Las correcziuns da las vias sin ils trajects «Punt San Valentin – Tschern» en Engiadina Bassa e «Punt Russein – Lumpegna» en Surselva sco er la reparaziun da la via dal Pass dal Flüela sin il traject «Scuflà Grond – Chant Sura».

Cumportament correct en ils conturns dals plazzals
La segirezza dals lavurants sin ils plazzals ha l'emprima prioritad. Central n'èsi betg mo ch'ins observia las disposiziuns per la protecziun dals lavurants, ch'èn generalmain valaivlas, mabain en spezial che las participantas ed ils participants dal traffic resguardian las activitads sin ils plazzals. Il UCB supplitgescha las participantas ed ils participants dal traffic da passar il plazzal en ina sveltezza adattada sco er en ina distanza suffizienta da las barrieras, da far dapli attenziun cun passar il plazzal e d'observar las ordinaziuns dal persunal dals plazzals e dals servetschs da traffic. Il UCB sa stenta da minimar las restricziuns per il traffic e da resguardar particularmain il temp da vacanzas principal durant la stad.

Infurmaziuns actualas
Sin la pagina d'internet strassen.gr.ch stattan a disposiziun las infurmaziuns actualisadas davart ils plazzals sco charta interactiva u sco glista da PDF cun indicaziuns detagliadas davart las lavurs e davart las restricziuns.

Recicladi sin las vias dal Grischun
La Info dal UCB la pli nova cuntegna infurmaziuns, co che l'Uffizi da construcziun bassa dal Grischun s'engascha per serrar en moda persistenta la circulaziun da material da construcziun.

Fotografia agiuntada:

Agiunta:

Info UCB La stagiun da construcziun 2023 cumenza

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 9.00 fin las 11.00), e‑mail Reto.Knuchel@tba.gr.ch
• Roger Stäubli, schef Construcziun da vias / substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel da las 8.00 fin las 9.15), e‑mail Roger.Staeubli@tba.gr.ch

Responsabladad: Uffizi da construcziun bassa