Da tuttas uras e durant 7 dis l'emna gida il Clom d'agid sanitar 144, sch'i dat dumondas medicinalas ed en cas d'urgenza. Independentamain, sch'i sa tracta d'in cas d'urgenza che po esser mortal u sch'i vegn dumandada l'adressa da l'apoteca per cas d'urgenza – las disponentas ed ils disponents scolads gidan.

Persunas en ina situaziun d'urgenza medicinala duain pudair sa fidar ch'ina persuna cumpetenta prendia encunter svelt il clom d'urgenza, ch'ella reageschia en moda professiunala e ch'ella dumondia immediatamain agid sche necessari. Il numer d'urgenza 144 garantescha quai per il Grischun.

En cas d'urgenza
Da princip vala: Pli gugent clamar ina giada da memia ch'ina giada damain. Las disponentas ed ils disponents da la Centrala d'alarm prendan encunter il clom e gidan vinavant. Sch'i fa da basegn, alarmeschan e coordineschan ellas ed els ils meds d'intervenziun e da salvament necessaris. En il chantun Grischun èn en acziun actualmain 349 gidantras e gidanters d'emprim agid plus. Ellas ed els èn repartids en 66 gruppas e vegnan – en cas d'urgenza – clamads en acziun da la Centrala dal clom d'agid sanitar. Las gidantras ed ils gidanters d'emprim agid prestan agid al lieu, fin che l'ambulanza da salvament arriva. En collavuraziun cun ils servetschs da salvament regiunals po la Centrala d'alarm 144 clamar l'ambulanza da salvament la pli vischina. Ils servetschs da salvament collavuran stretgamain per esser al lieu uschè svelt sco pussaivel.

Servetschs main enconuschents dal numer d'urgenza 144
Il sentiment, cura ch'in agid medicinal è in cas d'urgenza, po variar fitg. La populaziun duai savair, ch'il numer d'urgenza 144 po vegnir cumponì senza retegnientschas. Las disponentas ed ils disponents registreschan la situaziun entaifer curt temp e gidan gugent. Las emploiadas ed ils emploiads da la Centrala dal clom d'agid sanitar 144 dal Grischun cusseglian tut las persunas che tschertgan agid e cussegl en tut las dumondas da la medischina d'urgenza. Er intermedieschan ellas ed els medias e medis da servetsch, oculistas ed oculists, dentistas e dentists sco er apotecas per cas d'urgenza.

Activitads per il Di dal Clom d'agid sanitar 144
Ils 14-4, il Di dal Clom d'agid sanitar 144, stattan a disposiziun collavuraturas e collavuraturs da la Centrala dal clom d'agid sanitar 144 e dal servetsch da salvament per in barat persunal. Profitai da l'occasiun per visitar in'ambulanza da salvament, per emprender d'enconuscher las professiuns e per far dumondas.

• Cuira, Alexanderplatz, da las 11.00 fin las 18.00, en collavuraziun cun la Polizia da la citad e cun il Salvament Cuira
• Roveredo, Centro Sanitario Moesa, da las 9.00 fin las 16.00, en collavuraziun cun il Centro Sanitario e cun il Servizio Ambulanza del Moesano

Ulteriuras infurmaziuns sut:

L'app d'urgenza echoSOS: Tgi che ha installà questa app, vegn chattà pli svelt. Uschia po il salvament arrivar pli svelt.

Ulteriuras infurmaziuns: www.144.gr.ch

Survista dals servetschs da salvament chantunals: Geoportal dal chantun Grischun

Infurmaziuns:

Rudolf Leuthold, manader da l'Uffizi da sanadad, tel. +41 81 257 26 41 (cuntanschibel da las 9.00 fin las 11.00), e‑mail Rudolf.Leuthold@san.gr.ch

Responsabladad: Uffizi da sanadad