Victualias segiras da la stalla fin sin il plat, aua da baiver irreproschabla sco er animals sauns e ventiraivels che vegnan tegnids confurm a la spezia stattan en il focus da las activitads da l'Uffizi per la segirezza da victualias e per la sanadad d'animals (USVA). Ils trais labors moderns en l'edifizi administrativ Sinergia a Cuira èn in instrument impurtant per ademplir questas incumbensas en ils dus chantuns Glaruna e Grischun.
En il rapport annual 2022 guarda il USVA enavos sin controllas cumplessivas a favur da la segirezza da victualias e da la sanadad d'animals. Las consumentas ed ils consuments survegnan uschia fatgs e cifras nizzaivlas davart tschertas campagnas analiticas.
Buna qualitad en ils manaschis da victualias ed en ils provediments d'aua
Il sectur da la surveglianza uffiziala da victualias cumpiglia las controllas da l'aua da baiver, da duscha e da bogn sco er las inspecziuns tar ils manaschis che mettan en circulaziun chemicalias. Dals 5370 manaschis registrads e dals 630 provediments d'aua da baiver èn vegnids inspectads 35 pertschient. Tut en tut survegnan ils manaschis in bun attest. 94,5 pertschient dals manaschis testads pon vegnir attribuids a la classa da ristga fitg buna u buna.
Ultra da las inspecziuns uffizialas vegn l'autocontrolla dals manaschis da victualias survegliada tras in vast spectrum da controllas da products en il labor. Ils laboratoris analiseschan per exempel restanzas da pesticids en ils fritgs ed ils legums, controlleschan spaisas preparadas da manaschis d'alimentaziun u er chaschiel da muntogna e d'alp, sosas da salata e.u.v.
Sanadad d'animals: numerusas controllas ed analisas
L'onn 2022 ha il Servetsch veterinar inspectà in quart da las 4340 tratgas d'animals da niz registradas ed examinà las prescripziuns areguard la sanadad dals animals, areguard il diever da medicaments veterinars, areguard il traffic cun animals ed areguard la protecziun dals animals. Talas controllas vegnan fatgas per part er senza preannunzia. Tut en tut survegnan ils manaschis agriculs in bun attest. Las controllas areguard la protecziun dals animals, che vegnan fatgas sin annunzia da la populaziun, na concernan betg mo tratgas agriculas d'animals da niz, mabain pli e pli er tegnidas d'animals da chasa e d'animals selvadis, sco er tegnidas d'animals da niz per hobi.
La societad ha grondas pretensiuns d'avair animals sauns. Questas pretensiuns cumpiglian er mesiras preventivas cunter l'import d'epidemias d'animals sco la tuberculosa, la grippa d'utschels, la pesta da portgs africana e la CAE (caprine arthritis ed enzephalitis) dals pajais vischins. Il chantun Grischun cunfinescha directamain cun l'Italia e cun l'Austria e sto tegnair quint da questa circumstanza en sias stentas.
Il Labor per diagnostica veterinara a Cuira sustegna las incumbensas d'execuziun dal sectur da la sanadad d'animals cun ina vasta purschida da metodas analiticas. L'analisa patologica d'animals crappads u mazzads è plinavant l'unica da quest gener en la Svizra Orientala.
L'entir rapport annual 2022 è publitgà sut www.alt.gr.ch.
Infurmaziuns:
Dr. Giochen Bearth, veterinari chantunal e manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 13.00 fin las 15.00), e‑mail Giochen.Bearth@alt.gr.ch
Responsabladad: Uffizi per la segirezza da victualias e per la sanadad d'animals