La Regenza grischuna ha nominà Markus Haltiner sco nov manader da l'Uffizi da migraziun e da dretg civil. El surpiglia questa funcziun a partir d'immediat.

La Regenza grischuna ha elegì Markus Haltiner sco nov manader da l'Uffizi da migraziun e da dretg civil. L'um da 61 onns maina l'uffizi dapi mez december 2022 cun success en moda interimistica.

Markus Haltiner ha terminà in studi da scola auta en giurisprudenza (lic. iur.) ed è dapi il 1. da december 2000 il substitut dal manader da l'Uffizi da migraziun e da dretg civil. Plinavant è el derschader en uffizi accessoric tar la Dretgira regiunala Plessur.

L'Uffizi da migraziun e da dretg civil presta numerus servetschs cunzunt en connex cun nossa populaziun estra. El è responsabel per realisar las prescripziuns giuridicas e politicas da la politica da migraziun e d'asil. In ulteriur champ tematic impurtant da l'uffizi è l'integraziun da la populaziun estra. L'uffizi è responsabel per sviluppar e per realisar ils programs d'integraziun respectivs. Ulteriuras incumbensas èn l'emissiun da documents d'identitad per burgaisas e burgais svizzers, la concessiun da permissiuns polizialas, la bullaziun e la metrologia chantunala sco er l'execuziun da la legislaziun davart il dretg da burgais e davart il stadi civil. En quest connex ha Markus Haltiner l'incarica da manar circa 146 collavuraturas e collavuraturs.

Fotografia agiuntada:

Infurmaziuns:

• President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 12.00 fin las 13.30), e‑mail Peter.Peyer@djsg.gr.ch
• Markus Haltiner, manader da l'Uffizi da migraziun e da dretg civil, tel. +41 81 257 25 22 (cuntanschibel a partir da las 10.30), e‑mail Markus.Haltiner@afm.gr.ch

Responsabladad: Regenza