La Regenza ha dà en consultaziun il sboz per ina revisiun parziala da la Lescha davart las scolas autas e la perscrutaziun. Dapi il 1. d'avust 2014 è questa lescha la basa per sviluppar vinavant la scolaziun sin il stgalim da scola auta sco er la perscrutaziun en il Grischun.
La revisiun parziala permetta al chantun d'orientar las cundiziuns generalas als basegns actuals e futurs, da promover l'attractivitad economica dal chantun e da posiziunar il Grischun vinavant adequatamain sco lieu da furmaziun e da perscrutaziun sin plaun naziunal ed internaziunal.
La revisiun da la lescha na duai dentant betg resguardar tendenzas e fenomens da curta durada. Plitost sto vegnir concedì a las instituziuns dal sectur da las scolas autas e da la perscrutaziun il spazi necessari per promover l'agilitad ch'è ozendi indispensabla en vista a lur cumpetitivitad naziunala ed internaziunala. Quai duai rinforzar en moda persistenta il chantun Grischun sco lieu da scola auta e da perscrutaziun.
Adattaziun da las cumpetenzas da decisiun
La revisiun parziala da la Lescha davart las scolas autas e la perscrutaziun (LSAP) cuntegna adattaziuns da las cumpetenzas da decisiun da la Regenza e dal Cussegl da scola auta per sviluppar vinavant il portfolio da purschidas da las scolas autas. Plinavant facilitescha la revisiun parziala in'assimilaziun optimala a las disposiziuns da las ulteriuras scolas autas en Svizra. Ultra da quai regla ella l'aboliziun ed a medem temp il transferiment da disposiziuns da l'Ordinaziun dal Cussegl grond davart la renconuschientscha publica dals certificats da scola auta sco er davart la concessiun da contribuziuns a la Scola auta teologica da Cuira en la LSAP e la protecziun da grads e da titels academics en il sectur da las scolas autas.
Ils documents da consultaziun èn ussa disponibels
La consultaziun dura dals 29 da matg 2023 fin ils 27 d'avust 2023. Ils documents pon vegnir consultads sin la pagina d'internet dal chantun Grischun. Els pon er vegnir empustads tar il Departament d'educaziun, cultura e protecziun da l'ambient, saja quai per telefon (tel. +41 81 257 27 02) u per e-mail (info@ekud.gr.ch).
Infurmaziuns:
Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 11.30 fin las 12.00), e‑mail Jondomenic.Parolini@ekud.gr.ch
Responsabladad: Regenza