Il vicecumandant Gianfranco Albertini vegn a bandunar la Polizia chantunala per il cumenzament da l'onn proxim. Il motiv per quest pass èn differenzas persunalas e tematicas insuperablas cun il cumandant da polizia. Pervia da questa situaziun vegn Gianfranco Albertini a remetter sia funcziun directiva gia questa stad. Durant il temp restant vegn el a star a disposiziun per projects surchantunals sco er per l'ediziun d'ina versiun taliana dal commentari tar la Lescha grischuna da polizia e per scolaziuns en quest connex.

La Regenza deplorescha quest svilup. Cun Gianfranco Albertini banduna ina persunalitad cumprovada cun reputaziun naziunala la Polizia chantunala. La Regenza e la Polizia chantunala dal Grischun engrazian al litinent colonel Albertini per ses servetschs prezius ch'el ha prestà durant blers onns a favur dal chantun Grischun en la persecuziun penala ed en ils fatgs da polizia cun effect er ordaifer ils cunfins chantunals. Durant set onns è Gianfranco Albertini stà inquisitur tar la Procura publica, dapi 22 onns schef da la Polizia criminala e sco ultim vicecumandant da la Polizia chantunala dal Grischun. La Regenza giavischa a Gianfranco Albertini gia oz tut il bun per sia proxima fasa da vita.

Infurmaziuns:

President da la Regenza Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel da las 12.30 fin las 13.30), e‑mail Peter.Peyer@djsg.gr.ch

Responsabladad: Regenza