Cun «egual 21 – Plan d'acziun per l'egualitad en l'administraziun chantunala» rinforza la Regenza in mund da lavur che promova l'egualitad, la cumpatibilitad sco er l'inclusiun. Il plan d'acziun è vegnì elavurà durant ils ultims 12 mais en in process participativ e gida l'administraziun a s'adressar a differentas lavurantas e lavurants sco er a differentas spezialistas e spezialists.

L'administraziun chantunala ha identifitgà ses potenzials da meglieraziun: dacurt ha la Regenza approvà il Plan d'acziun per l'egualitad en l'administraziun chantunala (egual21). Il plan d'acziun cumpiglia quatter champs d'acziun: models da lavur variads, recrutaziun e svilup da persunal, structura d'organisaziun, sco er francaziun e structura. Mintga champ d'acziun includa finamiras e mesiras. Questas finamiras e mesiras èn vegnidas elavuradas d'ina gruppa da lavur che sa cumpona da collavuraturas e collavuraturs da differents stgalims ierarchics da tut ils departaments e da la Chanzlia chantunala. «Igl è noss giavisch d'integrar las pli diversas realitads da lavur en il Plan d'acziun per l'egualitad, quai per che las collavuraturas ed ils collavuraturs s'identifitgeschian cun las finamiras», di Barbara Wülser, manadra dal Post da stab per l'egualitad da las schanzas.

Identifitgar ed utilisar ils potenzials
Ord vista da l'egualitad èn la participaziun a la vita professiunala e l'access cun ils medems dretgs a las resursas puncts centrals. Las schanzas da svilup e da carriera duain resultar sin basa da la qualificaziun e betg sin basa da la schlattaina u da l'identitad da schlattaina. Pervia da la mancanza actuala e creschenta da persunas spezialisadas e da forzas da lavur, vegnan l'egualitad e la diversitad consideradas er da vart dals interprendiders sut in nov aspect: las strategias, ils process e las mesiras per promover l'egualitad e l'inclusiun garanteschan, ch'ils potenzials da differents umans – gist er da dunnas, da geniturs sco er da lavurantas e lavurants cun autras incumbensas d'assistenza u cun circumstanzas da vita spezialas – possian vegnir utilisads sin il martgà da lavur.

Il Plan d'acziun per l'egualitad collia questas duas perspectivas. Il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, accentuescha: «Ina cultura da lavur che resguarda l'egualitad, l'inclusiun e ch'è senza discriminaziun, gida tut las collavuraturas ed ils collavuraturs a scuvrir ed a sviluppar vinavant lur agens talents.» Tgi che sa sentia integrà ed acceptà, saja pli motivà, pli cuntent e pli saun. «La cuntentientscha e la motivaziun da las lavurantas e dals lavurants s'augmentan – e per consequenza er quellas da las patrunas e dals patruns.»

Il Plan d'acziun per l'egualitad sa basa sin ina retschertga ch'è vegnida fatga dal post spezialisà «UND», il Center da cumpetenza svizzer per la cumpatibilitad da la professiun cun ils ulteriurs secturs da la vita, e che datescha da l'onn 2022. Il rapport preschenta il stadi actual areguard l'egualitad e la cumpatibilitad en l'administraziun chantunala e formulescha recumandaziuns d'agir. Gia oz profitan las collavuraturas ed ils collavuraturs per exempel d'ina buna purschida da scolaziun e da furmaziun supplementara. A medem temp datti però grondas differenzas tranter ils posts da servetsch pertutgant la pussaivladad da concepir temporalmain e localmain il mintgadi da lavur. Ultra da quai metta il rapport en evidenza, che dunnas èn massivamain sutrepreschentadas sin il plaun directiv da l'administraziun chantunala.

Nova strategia da persunal en elavuraziun
L'administraziun chantunala è in'organisaziun eterogena cun fitg differents profils professiunals. Correspundentamain èn er las situaziuns da partenza fitg differentas: collavuraturas e collavuraturs cun prescripziuns liantas areguard lur lieu da lavur e lur temp da lavur n'han per exempel strusch la pussaivladad da decider sezs il lieu e las uras per ademplir las incumbensas. Questa differenza vuless il team da project che consista da represchentantas e represchentants dal Post da stab per l'egualitad da las schanzas, da l'Uffizi da persunal e dal post spezialisà «UND», resguardar cun realisar il plan d'acziun. «Nus ans tschentain finamiras realisablas ed a medem temp ambiziusas», declera la manadra dal project Miriam Erni. Quai na saja betg ina cuntradicziun, pretendia dentant er ina stretga collavuraziun cun ils posts da servetsch per concretisar detagliadamain las mesiras.

Egualitad è ina incumbensa interdisciplinara. Actualmain èn en curs numerus ulteriurs process en l'administraziun chantunala, che han interferenzas cun il Plan d'acziun per l'egualitad, per exempel en connex cun la renovaziun da l'infrastructura e da la hardware – chavazzin «New Work». Ils process sa fructifitgeschan vicendaivlamain, sinergias vegnan percepidas ed utilisadas. Uschia ha la Regenza concludì, che las finamiras dal Plan d'acziun per l'egualitad sajan ina basa per la nova strategia da persunal che vegn elavurada actualmain.

Ulteriuras infurmaziuns davart il tema egual21 datti qua.

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 15.30 fin las 16.00), e‑mail Jondomenic.Parolini@ekud.gr.ch
• Barbara Wülser, manadra dal Post da stab per l'egualitad da las schanzas, tel. +41 81 257 35 71, e‑mail Barbara.Wuelser@stagl.gr.ch

Responsabladad: Regenza