Mez zercladur ha l'Uffizi da construcziun bassa (UCB) remplazzà a Glion ed a Tumein dus signals da traffic variabels tras novas signalisaziuns dad LED digitalas. In grond avantatg envers ils vegls signals mecanics è la pussaivladad da preschentar en moda pli flexibla e pli detagliada ils stadis da las vias. Durant in onn fa il UCB tests cun la nova signalisaziun – e consultescha tranter auter las participantas ed ils participants dal traffic en chaussa.
«Obligaziun da metter si chadainas, cun excepziun da vehichels 4x4» u «Alpsu cuvert da naiv»: durant l'enviern mussan talas signalisaziuns il stadi actual da las vias a las viagiaturas ed als viagiaturs. Differentas vias da muntogna e da pass en il chantun Grischun èn numnadamain serradas u charrablas mo cun restricziuns durant l'enviern. Ina signalisaziun unitara e clera en tut il chantun duai augmentar la segirezza per las participantas ed ils participants dal traffic e minimar impediments da traffic. Cun tecnologias novas ed innovativas fa il UCB tests cun soluziuns modernas.
Pussaivladads pli flexiblas da reagir grazia a nova tecnologia
Ils vegls signals da traffic variabels (cun prismas che vegnan vulvids automaticamain) permettevan da preschentar maximalmain trais stadis da la via. Ils novs signals dad LED cuntegnan tschients da diodas traglischantas che pon vegnir reguladas mintgina per sasezza e che pon uschia vegnir programmadas tenor giavisch. Tras quai èsi pussaivel da furnir bler dapli infurmaziuns a las viagiaturas ed als viagiaturs. Durant la fasa da pilot vegn il UCB ad examinar intensivamain divers aspects manaschials e tecnics, sco per exempel il funcziunament dals signals en cas da temperaturas extremas. Tar ils criteris ils pli impurtants da l'evaluaziun tutgan dentant er la percepziun e l'acceptanza da las participantas e dals participants dal traffic. La legibladad (grondezza) sco er la visibilitad da la signalisaziun en cas da navaglias, da plievgia u da l'irradiaziun directa dal sulegl giogan ina rolla centrala.
Consultaziun da las participantas e dals participants dal traffic
Per survegnir resultats uschè expressivs sco pussaivel, ha il UCB tschernì vias fitg frequentadas per la signalisaziun. In signal è montà a Glion, suenter l'access a la via sursilvana en direcziun da Flem. Il segund signal è montà a Rehanau/Tumein sper la via sursilvana, avant la sortida per Tumein. Tuts dus lieus po il persunal tecnic cuntanscher svelt, sch'i dovra intervenziuns manualas. Durant la fasa da pilot vegnan ultra da quai consultadas las participantas ed ils participants dal traffic, quai per evaluar il project da pilot e sco basa per ulteriuras optimaziuns.
Fotografias agiuntadas:
© Uffizi da construcziun bassa dal Grischun
Infurmaziuns:
Reto Knuchel, inschigner chantunal, Uffizi da construcziun bassa, tel. +41 81 257 37 01 cuntanschibel da las 08.30 fin las 11.30), e‑mail Reto.Knuchel@tba.gr.ch
Responsabladad: Uffizi da construcziun bassa