L'onn 2021 han 2538 Grischunas e Grischuns retratg almain ina giada agid social economic. Quai èn 50 persunas damain che l'onn 2020. Cun 1,3 pertschient resta la quota d'agid social stabila e sa chatta vinavant sut la media naziunala da 3,1 pertschient.

Sche persunas che vivan en Svizra crodan en ina situaziun finanziala d'urgenza, pon ellas sa drizzar a l'agid social. Quel garantescha in minimum d'existenza social, sche l'agen salari ed auters agids finanzials na tanschan betg u na stattan betg a disposiziun ad uras. L'onn 2021 ha l'agid social sustegnì 2538 persunas en il chantun Grischun. Quai èn 1,3 pertschient da la populaziun chantunala. Questa quota è ina da las pli bassas en Svizra. Per l'onn 2021 importa la media naziunala 3,1 pertschient.

[Grafica 1: Quota d'agid social en il chantun Grischun ed en Svizra, 2010 fin 2021]

In martgà da lavur ch'è sa revegnì e paucas novas entradas en l'agid social
Malgrà las consequenzas rigurusas da la pandemia da COVID-19 n'è la quota d'agid social betg s'augmentada l'onn 2021. Intginas da las mesiras che la Confederaziun ha prendì per mitigiar las perditas finanzialas èn vegnidas cuntinuadas (tranter auter la prolungaziun e l'extensiun da las indemnisaziuns per lavur reducida, diarias supplementaras tar l'indemnisaziun da dischoccupaziun sco er indemnisaziuns per perditas da gudogn). A medem temp è sa revegnì il martgà da lavur e la quota da dischoccupaziun dal Grischun è sa sbassada sin 1,4 pertschient per la fin dal 2021. L'agid social ha registrà cleramain pli paucas novas entradas ch'ils onns avant. L'onn 2021 èn vegnids averts 467 dossiers novs, il 2020 èn quai stads 590 dossiers ed il 2019 518 dossiers.

Deliberaziun or da l'agid social pervia d'ina meglra situaziun da gudogn
Pervia da la situaziun difficila sin il martgà da lavur durant l'onn da pandemia 2020 avevan damain persunas pudì far il pass or da l'agid social. L'onn 2021 è però in meglierament da la situaziun da gudogn puspè stà il motiv principal per ina deliberaziun or da l'agid social: 197 persunas (36 %) han pudì sortir da l'agid social pervia da la meglra situaziun da gudogn. L'onn 2020 era la situaziun sin il martgà da lavur cleramain pli difficila. In meglierament da la situaziun da lavur era uschia stà mo tar 135 persunas (26,3 %) il motiv per terminar la dependenza da l'agid social. Tut en tut 560 dossiers han pudì vegnir serrads. Quai correspunda a stgars in terz da tut ils dossiers manads.

[Grafica 2: Total dals dossiers e dossiers novs e serrads, 2016 fin 2021]

Cler augment dal dumber da las asilantas ed ils asilants che han retratg agid social
Fugitivas e fugitivs cun asil vegnan sustegnids finanzialmain da la Confederaziun durant ils emprims 5 onns a partir da l'inoltraziun da la dumonda d'asil. Tar las persunas e las fugitivas ed ils fugitivs ch'èn admess provisoricamain dura il sustegn tras la Confederaziun 7 onns a partir da l'entrada en Svizra. Suenter ston ellas ed els vegnir sustegnids tras il chantun cun agid social economic.

L'onn 2015 èn las dumondas d'asil en Svizra s'augmentadas andetgamain pervia dals conflicts cuntinuants en la Siria, en l'Afganistan ed en l'Irac. Cun in retard sa mussa quest augment er en l'agid social. Il dumber d'asilantas e d'asilants che han retratg agid social è s'augmentà l'onn 2021 per 86 persunas sin 542, cumpareglià cun la perioda da l'onn precedent. Cunquai è s'augmentada er la quota da las asilantas e dals asilants che han retratg agid social da 17,6 pertschient (2020) a 21,4 pertschient (2021) en relaziun cun il total da las persunas che han retratg agid social.

[Grafica 3: Augment procentual dal dumber d'asilantas e d'asilants che han retratg agid social en il chantun Grischun ed en Svizra, cumpareglià cun l'onn precedent, 2016 fin 2021]

Gruppas socialas ch'èn il pli fitg periclitadas da depender da l'agid social
Las gruppas socialas ch'èn il pli fitg periclitadas da depender da l'agid social na sa midan strusch. Sco emprim èn ils uffants ed ils giuvenils pertutgads bler pli fitg da l'agid social che tut las autras gruppas da vegliadetgna. En la categoria da vegliadetgna da 0 fin 17 onns importa la ristga da depender da l'agid social 2,7 pertschient. En questa gruppa da vegliadetgna è la quota d'agid social pia stada il 2021 pli che duas giadas uschè gronda sco la media chantunala. Quai è d'attribuir al fatg, che chasadas da famiglias èn pli savens dependentas dal sustegn tras l'agid social che chasadas senza uffants.

[Grafica 4: Quota d'agid social tenor categoria da vegliadetgna en il chantun Grischun, 2021]

Sco segund èn famiglias d'in genitur cun uffants periclitadas bler pli fitg che tut ils auters tips da chasadas. La quota d'agid social da tut las chasadas en il chantun Grischun ha importà 1,5 pertschient l'onn 2021. Tar chasadas d'in genitur era la quota d'agid social 13 pertschient.

Sco terz augmenta er in nivel da scolaziun bass signifitgantamain la ristga da depender da l'agid social. Persunas senza furmaziun professiunala èn fermamain surrepreschentadas en l'agid social. En il chantun Grischun n'han 14,2 pertschient da la populaziun da 25 fin 64 onns nagina furmaziun professiunala. La quota da questa gruppa da persunas che ha retratg agid social ha importà 50,3 pertschient l'onn 2021.

Ulteriuras infurmaziuns chattan ins en l'Atlas statistic da l'Uffizi federal da statistica.

Infurmaziuns:

• Mathias Kaufmann, manader dal sectur spezial Servetschs socials, vicemanader da l'uffizi, tel. +41 81 257 26 68, (cuntanschibel da las 9.30 fin las 12.00), e‑mail Mathias.Kaufmann@soa.gr.ch
• Silvia Würmli, Post spezialisà per la statistica d'agid social Turitg e Svizra orientala, tel. +41 43 259 75 40, (cuntanschibla da las 09.30 fin las 12.00), e‑mail Silvia.Wuermli@statistik.ji.zh.ch

Responsabladad: Uffizi dal servetsch social

Infurmaziuns supplementaras davart la Statistica svizra da persunas che survegnan agid social SAS

La Statistica svizra da persunas che survegnan agid social è ina retschertga da datas annuala, che vegn realisada da l'Uffizi federal da statistica. La finamira da la statistica è quella da registrar il dumber e la structura da las persunas che retiran en Svizra agid social economic sco er prestaziuns socialas precedentas che dependan d'in basegn. La statistica sa basa sin la collavuraziun da la Confederaziun, dals chantuns e da las vischnancas.

Las basas da la Statistica da persunas che survegnan agid social èn vegnidas sviluppadas avant passa 20 onns. En il rom d'in project da modernisaziun vegnan ellas ussa adattadas a las relaziuns actualas ed als basegns che sa midan. La modernisaziun da la SAS ha las finamiras da reducir la lavur per ils posts da retschertga, da rinforzar l'analisa sco er da scursanir il temp tranter la retschertga e la publicaziun.

Cunquai che las lavurs da concept èn vegnidas terminadas per la fin da l'onn passà, cumenza la realisaziun a partir dal cumenzament dal 2023 fin la fin dal 2024. Durant questa fasa vegnan stgaffidas las premissas, per che las datas possian vegnir transferidas a partir dal schaner 2025 mintga mais al UFS, e quai sin fundament dal nov catalog da variablas. Ils emprims resultats da la statistica modernisada vegnan previsiblamain publitgadas l'emprim mez onn dal 2026. Indicaziuns pli detagliadas davart il project da modernisaziun e davart la realisaziun chattais Vus sut Uffizi federal da statistica.