Ils 31 da mars 2024 fineschan las periodas d'uffizi da Martin Gredig e da Fulvio A. Bottoni sco cussegliers da la Banca Chantunala Grischuna (BCG). La Regenza ha prolungà lur mandats respectivs per 4 onns fin ils 31 da mars 2028.
Martin Gredig è dapi l'onn 2016 commember dal cussegl da banca ed actualmain parsura da la cumissiun da controlla e da ristga. El è cussegliader d'interpresas independent ed è engaschà en differents cussegls administrativs. El ha studegià economia da manaschi cun ils accents en la gestiun da l'interpresa, en finanzas e contabilitad sco er en administraziun fiduziaria e revisiun a l'Universitad da Turitg.
Fulvio A. Bottoni è dapi l'onn 2016 commember dal cussegl da banca ed actualmain commember da la cumissiun da controlla e da ristga. El è professer per fatgs da banca e finanzas a la Scola auta spezialisada dal Grischun. El ha studegià economia da manaschi cun approfundaziun finanzas e contabilitad a l'anteriura Scola superiura d'economia e d'administraziun Cuira ed ha terminà in studi da master en fatgs da banca e finanzas a la Scola auta turitgaisa per scienzas applitgadas. Ultra da quai è el expert da rendaquint e da controlling.
La Regenza elegia las commembras ed ils commembers dal Cussegl da banca. En quest connex resguarda ella lur profil d'exigenzas per il Cussegl da banca da la BCG sco er las prescripziuns da l'Autoritad federala per la surveglianza dals martgads da finanzas (FINMA).
Il Cussegl da banca è l'organ suprem da la BCG. Il gremi da set persunas surveglia e controllescha la gestiun. Plinavant fixescha el l'orientaziun strategica, la politica da ristgas sco er l'urden reglamentar fundamental da la banca.
Fotografias agiuntadas:
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 17.45 fin las 18.30), e‑mail Martin.Buehler@dfg.gr.ch
Responsabladad: Regenza