Dapi che l'eveniment da la natira è capità è gia passà in mais. Pir ussa èsi però cler, quant grond ch'il donn è ch'ina bova en la Bregaglia ha chaschunà per la populaziun dals peschs en la Maira.

Ils 24 da fanadur 2023 han daratgas chaschunà ina bova en la Valun dal Largh, in'afflussiun da la vart sanestra da la Maira stgars 3 kilometers sur Vicosoprano. L'eveniment ha manà ina gronda quantitad da glitta e da glera en la Maira. Pervia da la concentraziun massiva da substanzas turblas en la Maira ch'è resultada consequentamain, han ins temì, che la populaziun da peschs haja subì donns. Las pestgas da controlla ch'ins ha realisà l'ultima emna cun l'apparat da pestgar electric han ussa mussà, che la dimensiun dal donn è nunspetgadamain gronda.

Sin tut en tut quatter trajects a 200 meters, han ins chattà mo gist trais peschs. Per in flum da la val da questa grondezza signifitga quest resultat, che la populaziun da peschs è probablamain vegnida stgatschada fin il cunfin naziunal. Pervia da las diversas construcziuns traversalas e perquai ch'i mancan auas da peschs lateralas na vegnan ils peschs betg a pudair repopular tut sulets il traject donnegià da la Maira. Quant enavant che la Maira po puspè vegnir restabilida sco aua da peschs, sto ussa vegnir mussà a maun d'ina analisa detagliada e cun considerar las pussaivladads.

Infurmaziuns:

Marcel Michel, manader da la partiziun Pestga, Uffizi da chatscha e pestga, tel. +41 81 257 38 94 (cuntanschibel da las 08.00 fin las 13.00), e‑mail Marcel.Michel@ajf.gr.ch

Responsabladad: Uffizi da chatscha e pestga