Per rinforzar il princip «ambulant avant staziunar» e per garantir in provediment che tegna quint da las pazientas e dals pazients en il chantun Grischun, han ils Servetschs psichiatrics dal Grischun (SPGR) lantschà l'onn 2018 il project da pilot «IAC – Intervenziun ambulanta en cas da crisa» en la Val dal Rain Grischuna. La «IAC» sa drizza a persunas cun ina crisa psichica acuta che dovran in sustegn svelt e consultant en il conturn chasan per impedir in'entrada staziunara en ina clinica. La purschida duai ussa vegnir augmentada en las regiuns Surselva e Grischun dal Sid (Engiadin'Ota).

En sia qualitad sco purtader metta il chantun Grischun a disposiziun als SPGR meds finanzials, per ch'els possian ademplir lur incumbensas. En vista al fatg, che l'augment da la purschida e l'occupaziun da plazzas respectiva vegn a durar in tschert temp, fixescha la Regenza la contribuziun da l'instituziun purtadra dal chantun per l'onn da partenza 2024 ad 850 000 francs. Ultra da quai ordinescha la Regenza il Departament da giustia, segirezza e sanadad d'integrar la realisaziun e l'evaluaziun dal project «IAC» en il program da la Regenza 2025 – 2028 e da dumandar il credit d'impegn correspundent en il rom dal preventiv per l'onn 2025.

Per la nova halla da fieras e d'occurrenzas Obere Au a Cuira ha la Regenza concedì – sin basa da la Lescha per promover il svilup economic en il chantun Grischun – a la Halla da la citad da Cuira SA ina contribuziun chantunala da 5 milliuns francs sut il titel infrastructuras relevantas per il sistem. Ultra da quai vegn concedì en il rom da la Nova politica regiunala da la Confederaziun (NPR) in emprest federal da 5 milliuns francs cumbinà cun ina contribuziun d'equivalenza chantunala da var 1,45 milliuns francs.

Tar quest project sa tracti da construir ina nova halla da fieras e d'occurrenzas utilisabla en moda multifuncziunala a l'Obere Au sco remplazzament per la halla da la citad vertenta a la Kasernenstrasse a Cuira. Cun la halla, cun il foyer e cun il loft duai la nova halla da fieras e d'occurrenzas porscher pussaivladads d'utilisaziun multifaras. La capacitad maximala en la halla principala importa 6500 plazzas da star en pe u 3000 plazzas da seser cun ina disposiziun da las plazzas da gala, en il foyer, da 1500 plazzas sco er en il loft sin il plaun sura da 300 plazzas. La halla da fieras e d'occurrenzas sa posiziunescha per occurrenzas a partir da 300 persunas. L'utilisabladad multifuncziunala, las differentas pussaivladads da configurar las tribunas e l'equipament tecnic duain far attractiv la nova halla da fieras e d'occurrenzas per organisaturas ed organisaturs sco er per giasts. Il project è budgetà cun custs d'investiziun da 43 milliuns francs.

© ARGE Marti/Künzli

La Regenza ha approvà in project da correcziun d'in curs d'aua en la vischnanca da Claustra per construir rempars en il Sagenbach. Dals custs totals dad 1,9 milliuns francs surpiglian il chantun e la Confederaziun tenor la cunvegna da program da la NGF maximalmain var 1,1 milliuns francs.

Il Sagenbach è in torrent che porta cun sai glera. En la part sut maina l'aual tras il territori d'abitadi da Saas, passa sut la via chantunala e sut la lingia da la Viafier retica, avant che sbuccar en la Landquart. Per franar l'activitad d'erosiun da l'aual, è il curs dal flum vegnì stabilisà en il passà sin lungs trajects cun rempars da correcziun. Dacurt han differentas auas grondas donnegià ils rempars existents. En il rom dal project approvà vegnan installads rempars d'atschal supplementars ed ina bloccada en furma da chascha sco er stabilisads rempars existents en il sectur dal «Mittelberg» tar «Abibela».

A chaschun da la sessiun extra muros dal Cussegl grond dals 12 fin ils 15 da zercladur 2023 a Claustra ha la suprastanza da la vischnanca da Claustra surdà a la Regenza ina brev cun trais giavischs da la vischnanca da Claustra. Ils giavischs concernan ils temas emprimas abitaziuns, management dal luf sco er sustegn tras l'administraziun chantunala. La Regenza ha ussa scrit ina resposta, en la quala ella exprima sia vista davart ils trais giavischs ed engrazia a la vischnanca per la collavuraziun grondiusa.

Agiunta: giavischs da la suprastanza communala da Claustra e respostas da la Regenza grischuna

En il rom da sia sesida champestra annuala ha la Regenza grischuna visità ils 27 da zercladur 2023 la scola dad Avras. En quest connex l'han las scolaras ed ils scolars surdà ina glista cun set giavischs. Ils differents basegns en ils secturs furmaziun, protecziun da la natira e da l'ambient sco er promoziun da las regiuns perifericas prenda la Regenza fitg serius. Per quest motiv prenda ella gugent posiziun tar tut ils giavischs da las scolaras e dals scolars en ina brev. Per appreziar ils giavischs envida la Regenza ultra da quai las scolaras ed ils scolars ad ina da las proximas sessiuns dal Cussegl grond a Cuira ed ad ina visita en la Chasa grischa.

Agiunta: giavischs da la scola dad Avras e respostas da la Regenza grischuna