A temp, per il cumenzament da la sessiun d'avust mesemna proxima, èn vegnidas terminadas las lavurs da renovaziun vi da l'edifizi dal Cussegl grond. Ultra da far adattaziuns en connex cun il concept da segirezza èn vegnidas installadas duas cabinas d'interprets sin la tribuna.

Dapi l'onn 2009 vegni profità da las sessiuns extra muros dal Cussegl grond per far lavurs da construcziun vi da l'edifizi dal Cussegl grond. Uschia er questa stad, cura ch'il Cussegl grond è sa radunà il zercladur a Claustra. Durant var trais mais e mez è vegnì realisà il nov concept da segirezza sco er las premissas architectonicas per la translaziun simultana da las debattas dal Cussegl grond. Ils custs totals vegnan calculads cun 2,3 milliuns francs.

Realisaziun dal concept da segirezza
Il giavisch dal Cussegl grond d'adattar il concept da segirezza als basegns actuals è stà decisiv per quest project. Sut quest aspect ha l'Uffizi da construcziun auta surlavurà – cun il sustegn da planisadras spezialisadas externas e da planisaders spezialisads externs – l'entir concept da segirezza. Cun l'approvaziun dal budget il december 2022 ha il Cussegl grond deliberà ils meds finanzials necessaris per las installaziuns da segirezza, sco per exempel la sortida d'urgenza sco er vaiders da protecziun tranter la tribuna e la sala.

Cabinas per la translaziun simultana
Per la translaziun simultana èn vegnidas installadas duas cabinas d'interprets sin la tribuna. Ultra da quai è vegnida renovada la tecnica da video ed endrizzada ina stanza da preparaziun e da pausa per las translaturas ed ils translaturs. En il senn d'in manaschi d'emprova profitan durant la sessiun d'avust 2023 l'emprim las deputadas ed ils deputads da las translaziuns simultanas dals votums. Sche questas emprovas gartegian, vegnan las translaziuns simultanas transmessas live a partir da la sessiun d'october 2023. Pervia da retards da furniziun, n'èsi betg stà pussaivel d'installar a temp singulas cumponentas tecnicas per ils microfons e per l'indriz da votar, ch'èn medemamain vegnids renovads. Perquai lavura il Cussegl grond durant la proxima sessiun cun in indriz da conferenza provisoric.

Las adattaziuns architectonicas en l'edifizi istoric dal Cussegl grond èn vegnidas accumpagnadas stretgamain da la Tgira chantunala da monuments.

Fotografias agiuntadas:

Foto 02 | Foto 03 | Foto 04

Infurmaziuns:

• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 13.00 fin las 14.00), e‑mail Andreas.Kohne@hba.gr.ch
• Patrick Barandun, Ratssekretariat, Standeskanzlei Graubünden, tel. +41 81 257 22 83 (cuntanschibel da las 08.00 fin las 12.00 e da las 14.00 fin las 17.00), e‑mail Patrick.Barandun@staka.gr.ch

Responsabladad: Chanzlia chantunala / Uffizi da construcziun auta dal Grischun