La Regenza ha deliberà il sboz d'ina revisiun parziala da la Lescha davart las scolas popularas. Dapi la revisiun totala da la lescha, l'onn 2012, ha il Cussegl grond acceptà quatter incumbensas che chaschunan in'adattaziun da la Lescha da scola u da l'Ordinaziun tar la Lescha da scola.

Las quatter incumbensas dal Cussegl grond tractan respectivamain pertutgan la finanziaziun da la scola en l'ospital, la reintroducziun da la classa d'introducziun, la cumpetenza e l'egualitad da las furmas da la scolaziun en il sectur simpel da la pedagogia speziala sco er il mantegniment da champs da classa, d'emnas da project e d'excursiuns en las scolas obligatoricas.

Supplementarmain a las incumbensas parlamentaras tracta la revisiun parziala ulteriurs temas che han in basegn d'agir. En connex cun il plant per pretender dapli paja dals 8 da december 2020 ch'è vegnì refusà da la Dretgira administrativa dal Grischun, è vegnì examinà en general il sectur da la scolina. Plinavant èn vegnids recepids en la revisiun parziala da la Lescha da scola ils temas da la facilitaziun da vegliadetgna e da la salarisaziun minimala da las persunas d'instrucziun, da las vacanzas da scola, dals custs per la tecnologia d'infurmaziun e da communicaziun, da l'autorisaziun d'instrucziun e dals dretgs da las scolaras e dals scolars.

Ils documents da consultaziun èn ussa disponibels
DLa consultaziun dura dals 31 d'avust 2023 fin ils 28 da november 2023. Ils documents pon vegnir consultads sin la pagina d'internet dal chantun Grischun. Els pon er vegnir empustads tar il Departament d'educaziun, cultura e protecziun da l'ambient, saja quai per telefon (tel. +41 81 257 27 02) u per e‑mail (info@ekud.gr.ch).

Infurmaziuns:

Cusseglier guvernativ dr. Jon Domenic Parolini, tel. +41 81 257 27 01 (cuntanschibel da las 11.00 fin las 11.30), e‑mail Jondomenic.Parolini@ekud.gr.ch

Responsabladad: Regenza