Las fermas plievgias dals dis passads han lavà gronds craps or d'in mir da sustegn al pass da l'Umbrail. Per pudair garantir vinavant la segirezza da las participantas e dals participants dal traffic prenda l'Uffizi da construcziun bassa dal Grischun mesiras da segiranza. Il pass da l'Umbrail vegn probablamain puspè dà liber per il traffic a partir da sonda, ils 23 da settember 2023.
Las fermas precipitaziuns han lavà la damaun dal glindesdi passà, ils 28 d'avust, a bun'ura, plirs craps e blocs or dal fundament d'in mir da sustegn al pass da l'Umbrail. Il mir da sustegn sa chatta sut l'hotel Alpenrose. Ils craps e blocs lavads ora èn crudads sin la serpentina ch'è situada gist sutvart.
Segirar il mir da sustegn instabil
Per pudair garantir vinavant la segirezza da las participantas e dals participants dal traffic franchescha l'Uffizi da construcziun bassa dal Grischun (UCB) il mir da crappa rutta cun ina stresa da betun d'injecziun d'ina grossezza da var 20 centimeters e cun pliras ancras d'ina lunghezza da var 8 meters. Il mir da sustegn è var 8 meters aut ed è posiziunà sin ina paraid-crap d'ina autezza da circa 16 meters. Ils craps che mancan en il fundament han consequenzas per l'entira stabilitad dal mir da sustegn. Ins sto temair ch'il mir collabeschia, uschia ch'ins na po betg excluder ch'i dettia ulteriuras crudadas da crappa e che l'entira via situada survart glischnia giu. Sur il mir da sustegn è la via gia sa sbassada per plirs centimeters.
Durada da las lavurs da construcziun
Las lavurs da segiranza cumenzan glindesdi, ils 4 da settember, cun l'installaziun e duran fin venderdi, ils 22 da settember. Sonda, ils 23 da settember, po il pass da l'Umbrail previsiblamain puspè vegnir avert per il traffic motorisà e betg motorisà. Il proxim giudicament dal UCB suonda mesemna, ils 20 da settember.
Fotografias agiuntadas:
Maletg 1: Survista da la crudada da glindesdi, ils 28 d'avust 2023.
Fotografia: © Baugeologie Cuira, C. Cantieni
Infurmaziuns:
Rafael da Silva, schef dal district 4 Scuol, Uffizi da construcziun bassa, tel. +41 81 257 69 57 (cuntanschibel da las 14.00 fin las 15.30), e‑mail Rafael.Dasilva@tba.gr.ch
Responsabladad: Uffizi da construcziun bassa