Oz suentermezdi maina l'Uffizi da vischnancas (UV) tras per la sisavla giada la dieta da vischnancas en l'arena grischuna a Cazas. Quest onn spetga la dieta cun ina novaziun: A nov infodesks pon las participantas ed ils participants s'infurmar d'emprim maun davart ils secturs tematics preschentads a la dieta. Spetgads vegnan passa 200 represchentantas e represchentants da var 90 vischnancas grischunas.

La dieta vegn averta tras il referat dal schef dal Departament da finanzas e vischnancas (DFV), cusseglier guvernativ Martin Bühler. El rapporta davart las experientschas sco commember da la Regenza grischuna sco er davart svilups actuals or da ses departament. Il manader da l'uffizi Thomas Kollegger infurmescha suenter davart fatschentas currentas e futuras dal UV. En il focus stattan dumondas instituziunalas sco er il svilup da las finanzas communalas. Ultra da quai preschenta Gion-Reto Hassler, manader da l'Uffizi per la valitaziun d'immobiglias (UVI), il stadi actual da las valitaziuns da revisiun en il Grischun.

Realisaziun da la Strategia concernent la forza idraulica
Cussegliera guvernativa Carmelia Maissen, scheffa dal Departament d'infrastructura, energia e mobilitad (DIEM), rapporta davart la realisaziun da la Strategia concernent la forza idraulica. Suenter che ses predecessur aveva gia infurmà detagliadamain davart quest project strategic impurtant per il chantun e per las vischnancas avant 2 onns, infurmescha la cussegliera guvernativa Carmelia Maissen davart il stadi actual da la realisaziun sco er davart las aspectativas dal chantun.

Refurma da la scolaziun commerziala «Commerziantas/commerziants 2023» sco ulteriur accent
L'avust 2023 ha la nova furmaziun mercantila da basa «commerzianta u commerziant AFQ» cumenzà. Las novaziuns chaschunan er midadas per ils manaschis d'emprendissadi, tar ils quals tutgan er numerusas vischnancas grischunas. La «fachstelle ostschweiz» è tranter auter responsabla per realisar la scolaziun specifica per la branscha publica. Michael Koch, mainagestiun da la «fachstelle ostschweiz», sclerescha en sias explicaziuns la refurma da commerzi e mussa l'impurtanza dal manaschi d'emprendissadi.

Infodesks davart differents temas
Per pudair porscher a las participantas ed als participants anc dapli servetsch e pussaivladads per in barat d'ideas, spetga la dieta da vischnancas da quest onn cun ina novitad: Suenter ils referats en l'arena grischuna porschan differentas instituziuns e firmas en la halla d'events infurmaziuns pli detagliadas e purschidas per las vischnancas.

Fotografia:

Infurmaziuns:

• Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01, e‑mail Martin.Buehler@dfg.gr.ch
• Thomas Kollegger, manader da l'Uffizi da vischnancas, tel. +41 81 257 23 81, e‑mail Thomas.Kollegger@afg.gr.ch

Responsabladad: Departament da finanzas e vischnancas