Quai che tutga gia en bleras citads svizras tar l'inventari, daventa ussa er realitad a Cuira: Il chantun Grischun e la Pro velo Grischun lantschan cuminaivlamain ina rait da parter velos. Durant 9 mais vegni evaluà cun differents partenaris locals, sch'il sistem funcziuna e quant gronda che la dumonda è. La cussegliera guvernativa Carmelia Maissen ha avert la rait da parter velos.

En il traffic quotidian gioga il velo ina rolla pli e pli impurtanta. Saja quai per ir a la lavur, a scola u en il bogn avert: cun il velo pon ins far distanzas pli curtas e mesaunas svelt ed en moda ecologica. Plinavant datti pussaivladads optimalas per cumbinar il velo cun il traffic public. Per ir davent da la staziun u da la fermada da bus fin a la destinaziun finala na datti nagut meglier ch'il velo. I n'è dentant betg adina cunvegnent d'avair in agen velo. «Gist sch'ins dovra mo mintgatant il velo, sch'ins na lavura betg adina en il medem lieu u sche las capacitads da chargiar il velo en il bus ed en il tren èn limitadas, èsi raschunaivel da parter velos», declera Simon Gredig, il mainagestiun da Pro velo Grischun e manader dal project Bikesharing. En in manaschi da pilot, che dura fin la fin dal zercladur 2024, vegni ussa evaluà, sch'ina purschida correspundenta vegn utilisada en la citad da Cuira.

10 lieus en la citad
Empè da cumprar ulteriurs velos da servetsch, ha il chantun Grischun decidì da finanziar 4 staziuns d'in purschider public da bikesharing. L'avantatg che resulta è ina meglra occupaziun dals velos, perquai che er la publicitad po far diever dals velos.

«Sco patrun che surpiglia responsabladad vulain nus dar a nossas collavuraturas ed a noss collavuraturs la pussaivladad da far il viadi a la lavur ubain ils viadis da lavur en moda cumadaivla ed ecologica», di la cussegliera guvernativa Carmelia Maissen, scheffa dal Departament d'infrastructura, energia e mobilitad.

Ultra dal chantun sustegnan er la Scola auta spezialisada dal Grischun, la Scola auta da pedagogia dal Grischun, l'Ospital chantunal sco er la citad da Cuira la finanziaziun d'ina staziun da parter velos en la citad. La rait è publica e cumpiglia tut en tut 10 staziuns cun 60 velos ed e-bikes. Emprestar pon ins ils velos sur l'app PubliBike u sur il SwissPass. Las collavuraturas ed ils collavuraturs dals partenaris pon duvrar ils velos gratuitamain durant 30 minutas. «Nus essan persvadids, che bikesharing è ina part impurtanta d'ina mobilitad effizienta en la citad», di il manader da project Simon Gredig.

Bilantscha suenter 9 mais
Gestiunà vegn il bikesharing da la firma PubliBike SA en collavuraziun cun la fundaziun Feschtland a Cuira, ch'è responsabla per il mantegniment dals velos e per la logistica. Sch'il manaschi da test ha success durant ils proxims 9 mais, duain la rait vegnir extendida ed ulteriuras staziuns en las aglomeraziuns vegnir integradas en il servetsch permanent.

Agiunta:

Charta cun staziuns da bikesharing

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 13.30 fin las 15.00), e‑mail Carmelia.Maissen@diem.gr.ch
• Thierry Müller, manader da la partiziun Traffic public, tel. +41 81 257 36 04 (cuntanschibel da las 9.30 fin las 10.30), e‑mail Thierry.Mueller@aev.gr.ch
• Simon Gredig, manader dal project Bikesharing e mainagestiun da Pro velo Grischun, tel. +41 81 641 22 87 (cuntanschibel da las 11.00 fin las 13.00), e‑mail Simon.Gredig@provelogr.ch

Responsabladad: Uffizi d'energia e da traffic