En la vischnanca da Roveredo cumenzan oz, ils 5 d'october 2023, las lavurs da construcziun per la nova halla da controlla da l'Uffizi per il traffic sin via dal Grischun. Cun l'edifizi nov vegnan stgaffidas tant las premissas da spazi sco er da manaschi per las controllas periodicas dals vehichels en la regiun Moesa.

Dapi l'onn 1974 ha l'Uffizi per il traffic sin via dal Grischun in lieu a Roveredo per examinar periodicamain ils vehichels da la regiun Moesa. Mintga onn vegnan laschads examinar là 2000 fin 2200 vehichels cun in pais total da maximalmain 3,5 tonnas. Oz vegnan fatgas questas examinaziuns en ina garascha che l'uffizi ha prendì a tschains a Roveredo. Ils locals da questa garascha na permettan betg pli in manaschi effizient. Plinavant n'ademplescha l'infrastructura existenta da l'edifizi betg ils basegns da spazi actuals e futurs.

Funcziunalitad e persistenza stattan en il center
En il rom d'ina procedura da planisaziun ch'è vegnida fatga, han ils architects Cereghetti & Bruni da Mesauc persvadì cun lur project per ina nova halla da controlla a Roveredo. En collavuraziun cun l'Uffizi per il traffic sin via han ils architects, sut la direcziun da l'Uffizi da construcziun auta, elavurà il project preliminar ed il project da construcziun. A chaschun da la sessiun da december 2022 ha il Cussegl grond approvà il credit d'impegn da 2,7 milliuns francs ch'èn necessaris per quest project.

L'edifizi cumpiglia ina halla da controlla, in local da segiurn cun la pussaivladad da far ils examens teoretics da manischunz, in local da biro, gardarobas cun locals sanitars, surfatschas da traffic sco er locals tecnics ed accessorics. Perquai che tut las utilisaziuns principalas èn organisadas sin in plaun, èn garantids in manaschi simpel ed effizient sco er in access senza obstachels.

La basa per in edifizi modern e persistent èn la construcziun da lain cun tavlegiada da lain da laresch ed ils elements fotovoltaics sin la fatschada e sin il tetg plat. La nova halla da controlla n'ha betg tschalers, per il fundament e per la platta dal palantschieu vegn duvrà per gronda part betun reciclà. La tscherna dal material da la construcziun purtanta sa drizza tenor las pretensiuns staticas, persistentas e da manaschi. Sur la platta dal palantschieu vegn l'entira construcziun elavurada en lain. Sche pussaivel vegni desistì da colur, da liadiras e da raffinaments da material, quai en il senn d'ina moda da construcziun ecologica.

Bain immobigliar sper il UVIAS
Sco nov lieu per la halla da controlla ha pudì vegnir cumprà in bain immobigliar sper la basa per il mantegniment da las vias existenta da l'Uffizi federal da vias a Roveredo. Uschia cuntinuescha il chantun er en la regiun Moesa cun la coexistenza cumprovada da basas tecnicas da l'Uffizi da construcziun bassa e da posts da controlla da l'Uffizi per il traffic sin via, sco che quai è il cas gia a Tavau Frauenkirch, a Glion, a Samedan, a Scuol ed a Li Curt.

Retratga l'atun 2024
Oz cumenzan las lavurs da construcziun che duran in onn. Las lavurs da la construcziun brutta vegnan ad esser terminadas fin la fin da favrer 2024. Suenter suondan las lavurs da cumplettaziun. Per realisar il project han ins pudì incumbensar per gronda part interpresas localas. Fin l'atun 2024 vegn l'edifizi ad esser terminà. Durant las lavurs da construcziun cuntinuescha il manaschi en il lieu vertent a Roveredo.

Dapli infurmaziuns:

Charta davart ils lieus da las hallas da controlla en il Grischun sin la pagina d'internet da l'Uffizi per il traffic sin via dal Grischun

Visualisaziun:

© Cereghetti & Bruni Architetti, Mesocco

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 12.30 fin las 13.30), e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 11.30 fin las 12.30), e‑mail Andreas.Kohne@hba.gr.ch

Responsabladad: Departament d'infrastructura, energia e mobilitad