La Regenza ha approvà la revisiun parziala da l'Ordinaziun davart las valitaziuns uffizialas d'immobiglias. Questa ordinaziun entra en vigur il 1. da december 2023. Cun la revisiun parziala vegnan reducidas las taxas che las proprietarias ed ils proprietaris ston pajar. Quai pertutga per exempel las taxas per valitaziuns, sche la proprietaria u il proprietari ha fatg investiziuns, sco er ils custs per la consegna d'actas. Ultra da quai vegn la taxa maximala che vegn incassada reducida da 25 000 francs a 15 000 francs ed il rabat concedì per grondas taxas, vegn augmentà per passa 30 pertschient. Ils custs per ina valitaziun da revisiun senza investiziuns essenzialas (q.v.d. sch'ils custs èn sut 100 000 francs) – quai che vala per la gronda part da las valitaziuns – na vegnan er vinavant betg adossads a las proprietarias ed als proprietaris.

Ultra da quai ha la Regenza adattà ils criteris d'inspecziun per valitaziuns uffizialas. La finamira da la midada è quella da laschar far ina experta u in expert da valitaziun ina inspecziun cunzunt en quels cas, nua che l'inspecziun generescha ina plivalur per la valitaziun u per motivs assicuratorics.