En il rom dal dialog regular cun il chantun Grischun ha la Regenza grischuna retschavì oz il cusseglier federal Ignazio Cassis a Poschiavo. Il punct culminant da l'inscunter cun il minister da l'exteriur è stada la suttascripziun da la cunvegna «Piccolo Erasmus». Ulteriurs temas èn stads la promoziun da las linguas minoritaras e las relaziuns transcunfinalas.
Il discurs dad oz cun il cusseglier federal Ignazio Cassis è gia stà il sisavel barat uffizial cun la Regenza grischuna dapi sia entrada en uffizi l'onn 2017. Quella giada ha il minister da l'exteriur cumenzà in dialog politic regular cun il Grischun per discutar las sfidas ed ils giavischs particulars dal chantun triling e per rinforzar il barat d'infurmaziuns tranter il Cussegl federal e la Regenza.
Cunvegna per «Piccolo Erasmus»
En il center da l'inscunter dad oz è stada la suttascripziun da la cunvegna cuminaivla per il project «Piccolo Erasmus». Il project ch'è vegnì lantschà l'onn 2021, pussibilitescha in barat da plirs mais a las collavuraturas ed als collavuraturs da las administraziuns chantunalas dal Grischun e dal Tessin sco er dal Departament federal d'affars exteriurs. Cun quest project conferman tut las parts participadas lur engaschament per ina represchentanza equilibrada da las differentas cuminanzas linguisticas en l'administraziun federala ed en las interpresas federalas. Ultra da quai duain vegnir promovidas las enconuschientschas da las autras linguas naziunalas e la chapientscha per l'autra regiun culturala.
En il focus dal dialog dad oz èn stads ultra da quai ulteriurs temas d'interess cuminaivel, per exempel las relaziuns transcunfinalas e la promoziun da las linguas minoritaras. Er la proxima ediziun da la «Emna Rumantscha», l'emna internaziunala da la lingua rumantscha 2024, è stada in tema a chaschun dal discurs dad oz cun il cusseglier federal Ignazio Cassis.
Fotografias agiuntadas:
Foto 2 | Foto 3 | Foto 4
Infurmaziuns:
President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch
Responsabladad: Regenza