Las chatschadras ed ils chatschaders en il chantun han prestà ina fitg buna lavur e la preda da chatscha auta 2023 è stada buna, malgrà las nauschas cundiziuns da chatscha. Entant che la preda da chamutschs e da chavriels è stada sur la media dals ultims 10 onns, èn vegnids sajettads var 5 pertschient damain tschiervs ch'en la media da blers onns. Per ademplir ils plans da prelevaziun ch'èn fixads sin in aut nivel per l'entir chantun, ston anc vegnir sajettads il november ed il december tschiervs e chavriels en bleras regiuns dal chantun.

Las cundiziuns per la chatscha da tschiervs èn stadas disfavuraivlas il settember, quai pervia da las temperaturas chaudas. Grazia al grond engaschament da las chatschadras e dals chatschaders èn però tuttina vegnids sajettads 3457 tschiervs. Ultra da la preda da chamutschs, ch'è levamain surproporziunala, èsi spezialmain legraivel, che las chatschadras ed ils chatschaders n'han sajettà quest onn betg mo dapli bucs-chavriel, mabain er cleramain dapli chauras-chavriel.

Resultats da l'emprima part da la chatscha grischuna 2023:

I spetga ina lavur pretensiusa
Pervia da l'influenza regiunala fitg gronda da la selvaschina en il guaud e pervia da las determinaziuns en la strategia da la Regenza «Spazi da viver guaud-selvaschina 2021» è resultà in plan da prelevaziun da tschiervs cun il grond dumber da 5275 tschiervs. Quest plan vala sco ademplì, sch'i èn vegnids sajettads almain 3050 animals feminins. Per che l'incumbensa da chatscha saja ademplida, ston vegnir sajettads durant la chatscha speziala anc 2218 tschiervs feminins e lur vadels. En differentas regiuns sto vegnir manada tras il november e december er ina chatscha speziala da chavriels. Il plan da prelevaziun per l'entir chantun importa 297 animals. En il «Rapport davart il guaud e davart la selvaschina Val dal Rain/Scanvetg-Tumleastga/Mantogna-Stussavgia 2020» è vegnida definida la chatscha speziala da starnigls da chamutsch en differents territoris sco mesira per meglierar la regiuvinaziun dal guaud. En quatter territoris vegnan dads liber tut en tut 19 starnigls da chamutsch.

La collavuraziun è decisiva
La reducziun da la populaziun da selvaschina d'ungla è ina contribuziun impurtanta per garantir la regiuvinaziun natirala dal guaud. Perquai che la chatscha da tschiervs e da chavriels ha lieu il november e december principalmain en ils territoris, nua che la selvaschina passenta l'enviern, è la chatscha speziala particularmain impurtanta per il mantegniment a lunga vista da guauds da protecziun sauns e bain structurads. L'adempliment dals plans da prelevaziun ambizius vegn ad esser er quest onn en differentas regiuns ina gronda sfida. Igl è impurtant che la lavur da las chatschadras e dals chatschaders vegnia sustegnida da tut las persunas participadas, en spezial er da las proprietarias e dals proprietaris da guaud, e quai er en cas da cundiziuns difficilas.

Agiuntas:

Plan da prelevaziun per tschiervs, chatscha speziala 2023

Plan da prelevaziun per chavriels, chatscha speziala 2023

Infurmaziuns:

• Lukas Walser, manader da la partiziun Selvaschina e chatscha, Uffizi da chatscha e pestga, tel. +41 81 257 21 58 (cuntanschibel da las 8.30 a las 10.00), e‑mail Lukas.Walser@ajf.gr.ch
• Urban Maissen, selvicultur chantunal, Uffizi da guaud e privels da la natira, tel. +41 79 475 52 11 (cuntanschibel da las 10.00 a las 12.00), e‑mail Urban.Maissen@awn.gr.ch

Responsabladad: Uffizi da chatscha e pestga